News - Հայաստանի և Լեհաստանի արտգործնախարարները քննարկել են Ադրբեջանի քաղաքականության անթույլատրելիությունը

Հայաստանի արտաքին գործերի նախարարությունից NEWS.am -ին հայտնում են, որ հինգշաբթի Նյու Յորքում ՄԱԿ-ի Գլխավոր ասամբլեայի 78-րդ նստաշրջանի շրջանակում Հայաստանի արտգործնախարար Արարատ Միրզոյանը հանդիպել է Լեհաստանի արտաքին գործերի նախարար Զբիգնև Ռաուի հետ։ Նրանք քննարկել են տարածաշրջանային անվտանգության և կայունության հարցեր։ Անդրադառնալով երեքշաբթի օրը Լեռնային Ղարաբաղի ժողովրդի դեմ Ադրբեջանի կողմից սանձազերծված ռազմական ագրեսիային՝ ԱԳ նախարար Միրզոյանն ընդգծել է Լեռնային Ղարաբաղի հայ ժողովրդին էթնիկ զտումների ենթարկելու Ադրբեջանի քաղաքականության անթույլատրելիությունը։ Իսկ Լեռնային Ղարաբաղում զանգվածային հանցագործությունների և հումանիտար աղետի կանխարգելման համատեքստում ընդգծվել է միջազգային գործընկերների կողմից արդյունավետ և հստակ միջոցառումների հրատապությունը։ Հանդիպման օրակարգում են եղել նաև հայ-լեհական երկկողմ օրակարգը, ինչպես նաև Հայաստան-ԵՄ գործընկերությունը։