News - Պատրիկ Քարամ. Ես սգում եմ միջազգային կարգի իմ բոլոր պատրանքները

Սգո օրեր, անսահման տառապանք բոլորի կողմից դավաճանված ու լքված հայ քաջարի մարտիկների բռնի կապիտուլյացիայից առաջ։ Այս մասին իր X միկրոբլոգում գրել է Ֆրանսիայի Իլ-դե-Ֆրանս շրջանային խորհրդի անդամ Պատրիկ Քարամը։ «Երբեք չէի կարող պատկերացնել, որ մի օր ադրբեջանական բանակը շքերթի է անցնելու Ստեփանակերտի փողոցներով: Երբեք չէի պատկերացնի, որ իմ սերունդը կտեսնի, որ հայկական որեւէ ներկայություն կվերանա իր պատմական հողերից: Ես երբեք չէի հավատա, որ միջազգային հանրությունը, Արևմուտքը և Եվրոպան վախկոտորեն կլռեն ցեղասպանության և էթնիկական զտումների այս սպառնացող վտանգի առջև: Այսօր ես սգում եմ միջազգային իրավունքը, որը ոտնահարվեց առանց որևէ արձագանքի։ Ես սգում եմ ՄԱԿ-ի Անվտանգության խորհրդի կորուստը, որը ցույց տվեց իր անհամապատասխանությունը միջազգային իրավունքի կիրառման հարցում: Ես սգում եմ միջազգային կարգի իմ բոլոր պատրանքները, որոնք կպաշտպանեն ամենաթույլներին բռնապետության ագրեսիայից: Այսօր սգո օր է, և ես այլ խոսք չեմ ուզում լսել Ուկրաինայի մասին»,- գրել է նա։ Ավելի վաղ NEWS.am-ը հայտնել էր, որ Ադրբեջանը երեքշաբթի օրը լայնածավալ հարձակում է սկսել Արցախի (Լեռնային Ղարաբաղի) վրա։ Արդյունքում զոհվել է ավելի քան 200 մարդ, եւս 400-ը վիրավորվել են։ Ադրբեջանում վերջինիս գործողությունները՝ ուղղված Լեռնային Ղարաբաղի խաղաղ բնակչությանը ոչնչացնելուն, անվանեցին «տեղական հակաահաբեկչական միջոց»։ Ելնելով ճակատում ստեղծված ծանր իրավիճակից՝ Արցախի իշխանությունները չորեքշաբթի ընդունել են ռուս խաղաղապահների առաջարկը՝ կրակը դադարեցնելու վերաբերյալ։ Ըստ այդմ, պայմանավորվածություն է ձեռք բերվել սեպտեմբերի 20-ի ժամը 13.00-ի դրությամբ ռազմական գործողությունների ամբողջական դադարեցման վերաբերյալ։