News - Քիրբի. Վաշինգտոնը շարունակում է կապեր պահպանել Լեռնային Ղարաբաղում հակամարտող կողմերի հետ

ԱՄՆ-ն ակնկալում է, որ Լեռնային Ղարաբաղում շուտով կձևավորվի վերջնական զինադադար և կշարունակի կապ պահպանել հակամարտող կողմերի հետ։ Այս մասին լրագրողների համար ճեպազրույցում հայտարարել է Սպիտակ տան Ազգային անվտանգության խորհրդի ռազմավարական հաղորդակցությունների համակարգող Ջոն Քիրբին։ «Մենք նախնական տեղեկություններ ենք ստանում, որ մոտ ժամանակներս կարող է զինադադար լինել: Մենք, անշուշտ, հույս ունենք, որ դա իրագործվի, և բռնությունները կդադարեն, և հումանիտար իրավիճակը չի վատթարանա»,- ասաց նա: Քիրբին հավելել է, որ ԱՄՆ-ը կշարունակի կապեր պահպանել հակամարտող կողմերի, ինչպես նաև իր գործընկերների հետ։ Նրա խոսքով՝ Միացյալ Նահանգները նույնպես ուշադիր հետեւում է տարածաշրջանում հումանիտար իրավիճակի զարգացմանը։ «Ակնհայտ է, որ մենք դեռ շատ, շատ ուշադիր հետևում ենք Լեռնային Ղարաբաղի ներսում հումանիտար իրավիճակի վատթարացմանը», - ասաց նա: Սպիտակ տան խոսնակը հավելել է, որ Վաշինգտոնը միշտ հանդես է եկել հակամարտության խաղաղ կարգավորման օգտին։