News - Սիմոնյանն ու Ադամովան քննարկել են Հայաստանի և Չեխիայի միջև առկա տնտեսական ներուժը

Պաշտոնական այցով Չեխիայի Հանրապետությունում գտնվող ՀՀ ԱԺ նախագահ Ալեն Սիմոնյանի գլխավորած պատվիրակությունը հոկտեմբերի 17-ին հյուրընկալվել է Չեխիայի խորհրդարանում՝ հանդիպելով երկրի խորհրդարանի Պատգամավորների պալատի նախագահ Մարկետա Պեկարովա Ադամովայի հետ։ Այս մասին հայտնում է Հայաստանի Ազգային ժողովի մամուլի ծառայությունը։  Հանդիպման սկզբում Չեխիայի խորհրդարանի Պատգամավորների պալատի նախագահը կրկին շնորհակալություն հայտնեց Ալեն Սիմոնյանին տարեսկզբին Հայաստան կատարած այցի ընթացքում ցուցաբերած ջերմ ընդունելության համար՝ հավելելով, որ այս հանդիպումը իրենց նախորդ հանդիպման շարունակությունն է։ . ՀՀ ԱԺ նախագահն իր հերթին շնորհակալություն է հայտնել չեխ գործընկերոջը ջերմ ընդունելության համար՝ նշելով, որ նման հանդիպումներն էլ ավելի են ամրապնդում երկկողմ բարեկամական կապերը։ Հանդիպման ընթացքում զրուցակիցներն անդրադարձել են երկկողմ հետաքրքրություն ներկայացնող հարցերի լայն շրջանակի։ Չեխիայի խորհրդարանի Պատգամավորների պալատի նախագահը հատուկ շեշտադրումով խոսել է Հայաստանի ժողովրդավարական ձեռքբերումների և երկրում իրականացվող բարեփոխումների մասին՝ նշելով, որ Չեխիան աջակցում է ԵՄ-ին մերձենալու Հայաստանի ցանկությանը և պատրաստակամությանը։ Ալեն Սիմոնյանը չեխ գործընկերոջ ուշադրությունը հրավիրեց մեր տարածաշրջանում տիրող իրավիճակի վրա՝ ներկայացնելով կառավարության նախաձեռնած «Խաղաղության խաչմերուկ» նախագիծը և վերահաստատեց Հայաստանի պատրաստակամությունը Ադրբեջանի հետ խաղաղության հաստատման գործընթացում։ Զրուցակիցներն անդրադարձել են նաև երկու երկրների միջև առկա տնտեսական ներուժին՝ նշելով, որ այն իրացնելու լայն հնարավորություն կա։ Ալեն Սիմոնյանը շրջեց նաև ՓՊ շենքում և գրառում կատարեց Պատվավոր հյուրերի գրքում. Հանդիպումից հետո ՀՀ Ազգային ժողովի նախագահը և Չեխիայի խորհրդարանի Պատգամավորների պալատի նախագահը հանդես են եկել մամուլի համար հայտարարությամբ.