News - Կրեմլը դեռ չի կարող հաստատել Արցախում հրադադարի մասին տեղեկությունը
Business Strategy
Կրեմլը դեռ չի կարող հաստատել Արցախում հրադադարի մասին տեղեկությունը
ՌԴ նախագահի մամուլի քարտուղար Դմիտրի Պեսկովն անդրադարձել է Լեռնային Ղարաբաղում ռուս խաղաղապահների միջնորդությամբ հրադադարի մասին լուրերին։ Նա հայտարարել է, որ չի կարող ճշտել այս տեղեկությունը, փոխանցում է «ՌԻԱ Նովոստին»։ «Ես դեռ մանրամասներին ծանոթ չեմ, ուստի չեմ կարող վերջնական հայտարարություններ տալ այս հարցում։ Եվս մեկ անգամ կցանկանայի ընդգծել, որ այնտեղ մշտական կապեր են հաստատվում, ինչը դժվար է դարձնում այս պահին հաստատել այդ տեղեկատվությունը»,- լրագրողներին ասել է Պեսկովը։ Ավելի վաղ Արցախի տեղեկատվական կենտրոնը հայտնել էր, որ Արցախի (Լեռնային Ղարաբաղի) իշխանություններն ընդունել են Արցախում ռուսական խաղաղապահ առաքելություն իրականացնող զորախմբի հրամանատարության առաջարկը՝ չորեքշաբթի ժամը 13.00-ի դրությամբ ռազմական գործողությունների ամբողջական դադարեցման վերաբերյալ։ Ինչպես ավելի վաղ հայտնել էր NEWS.am-ը, սեպտեմբերի 19-ին՝ ժամը 13.00-ից, Լեռնային Ղարաբաղի շփման գծի ողջ երկայնքով Ադրբեջանի զինված ուժերը հրետանային կրակ են բացել՝ փորձելով ճեղքել Լեռնային Ղարաբաղի պաշտպանության ուժերի պաշտպանական գիծը։ Այս պահին Լեռնային Ղարաբաղի մայրաքաղաք Ստեփանակերտը և այլ բնակավայրեր ենթարկվում են ուժեղ հրետակոծությունների։ Լեռնային Ղարաբաղի Մարդու իրավունքների պաշտպան Գեղամ Ստեփանյանը արձանագրել է բազմաթիվ զոհեր և վիրավորներ խաղաղ բնակիչների, այդ թվում՝ երեխաների շրջանում։
About usyoo
Categories
Tags
