News - Պեսկով. Ղարաբաղում գտնվող ռուս զինվորականներն ակտիվորեն աջակցում են տարհանմանը

Ղարաբաղում տեղակայված ռուս զինվորականները «բանավոր սխոլաստիկայով» չեն զբաղվում, այլ ակտիվորեն ներգրավված են գործնական ջանքերում, մասնավորապես՝ աջակցելով խաղաղ բնակչության տարհանմանը։ Այս մասին իր հայտարարության ժամանակ ընդգծել է ՌԴ նախագահի մամուլի քարտուղար Դմիտրի Պեսկովը, փոխանցում է РИА Новости-ն։ «Մենք շարունակում ենք մեր շփումները Ղարաբաղի հայերի հետ. Մեր զինվորական անձնակազմը չի զբաղվում զուտ «բանավոր սխոլաստիկայի» մեջ, փոխարենը զբաղվում է կոնկրետ առաջադրանքներով։ Նրանք կատարում են իրենց պարտականությունները որպես խաղաղապահներ՝ ակտիվորեն մասնակցելով վտանգավոր տարածքներից քաղաքացիական անձանց, հատկապես երեխաների տարհանմանը: Այս մարդասիրական աշխատանքը շարունակվում է շուրջօրյա»,- նշել է Պեսկովը։ Պերկովը նաև նշել է, որ Մոսկվան այս պահին սպասում է Ռուսաստանի նախագահ Վլադիմիր Պուտինի և Հայաստանի վարչապետ Նիկոլ Փաշինյանի հեռախոսազրույցի ժամկետների հաստատմանը։ Պեսկովը նաեւ հայտարարել է, որ չի կարող ճշտել ռուս խաղաղապահների միջնորդությամբ Լեռնային Ղարաբաղում հրադադարի մասին տեղեկատվությունը։ Ավելի վաղ Արցախի տեղեկատվական կենտրոնը հայտնել էր, որ Արցախի (Լեռնային Ղարաբաղի) իշխանություններն ընդունել են Արցախում ռուսական խաղաղապահ առաքելություն իրականացնող զորախմբի հրամանատարության առաջարկը՝ չորեքշաբթի ժամը 13.00-ի դրությամբ ռազմական գործողությունների ամբողջական դադարեցման վերաբերյալ։ Ինչպես ավելի վաղ հայտնել էր NEWS.am-ը, սեպտեմբերի 19-ին՝ ժամը 13.00-ից, Լեռնային Ղարաբաղի շփման գծի ողջ երկայնքով Ադրբեջանի զինված ուժերը հրետանային կրակ են բացել՝ փորձելով ճեղքել Լեռնային Ղարաբաղի պաշտպանության ուժերի պաշտպանական գիծը։ Այս պահին Լեռնային Ղարաբաղի մայրաքաղաք Ստեփանակերտը և այլ բնակավայրեր ենթարկվում են ուժեղ հրետակոծությունների։ Լեռնային Ղարաբաղի Մարդու իրավունքների պաշտպան Գեղամ Ստեփանյանը արձանագրել է բազմաթիվ զոհեր և վիրավորներ խաղաղ բնակիչների, այդ թվում՝ երեխաների շրջանում։