News - Արտակ Բեգլարյան. Արցախում ժողովուրդը կանգնած է ջարդերի աճող վտանգի առաջ

Արցախում (Լեռնային Ղարաբաղում) ժողովուրդը կանգնած է ջարդերի աճող ռիսկերի առաջ. Այս մասին «X» (նախկին թվիթերյան) իր միկրոբլոգում գրել է Արցախի նախկին պետնախարար, մարդու իրավունքների պաշտպան Արտակ Բեգլարյանը։ «Ադրբեջանին հաջողվել է վերահսկողության տակ առնել Արցախի որոշ ռազմավարական բարձունքներ և ճանապարհներ, ինչպես նաև մի քանի համայնքներ։ Նրանք նաև կտրել են ճանապարհային կապը Արցախի որոշ հատվածների միջև՝ ստեղծելով լրացուցիչ տեղական շրջափակումներ բոլոր շրջաններում։ Ժողովուրդը կանգնած է ջարդերի աճող ռիսկերի առջեւ»,- գրել է նա։ Ավելի վաղ Արցախի տեղեկատվական կենտրոնը հայտնել էր, որ Արցախի (Լեռնային Ղարաբաղի) իշխանություններն ընդունել են Արցախում ռուսական խաղաղապահ առաքելություն իրականացնող զորախմբի հրամանատարության առաջարկը՝ չորեքշաբթի ժամը 13.00-ի դրությամբ ռազմական գործողությունների ամբողջական դադարեցման վերաբերյալ։ Ինչպես ավելի վաղ հայտնել էր NEWS.am-ը, սեպտեմբերի 19-ին՝ ժամը 13.00-ից, Լեռնային Ղարաբաղի շփման գծի ողջ երկայնքով Ադրբեջանի զինված ուժերը հրետանային կրակ են բացել՝ փորձելով ճեղքել Լեռնային Ղարաբաղի պաշտպանության ուժերի պաշտպանական գիծը։ Այս պահին Լեռնային Ղարաբաղի մայրաքաղաք Ստեփանակերտը և այլ բնակավայրեր ենթարկվում են ուժեղ հրետակոծությունների։ Լեռնային Ղարաբաղի Մարդու իրավունքների պաշտպան Գեղամ Ստեփանյանը արձանագրել է բազմաթիվ զոհեր և վիրավորներ խաղաղ բնակիչների, այդ թվում՝ երեխաների շրջանում։