News - Հայաստանի արդարադատության նախարարը հրաժարական է տվել

Հայաստանի արդարադատության նախարար Գրիգոր Մինասյանը հրաժարական է տվել։ Մինասյանն այս առնչությամբ երեքշաբթի հայտարարություն է տարածել. «Այսօր ես էլ որոշեցի միանալ իմ պաշտոնավարման դեմ ստորագրահավաքին, հրաժարականի դիմում եմ ներկայացրել վարչապետին։ Խորհրդարանական կառավարման համակարգում դժվար կլինի զբաղեցնել նախարարի պաշտոնը, եթե դրական համագործակցություն չունենաս թեկուզ մեկ պատգամավորի հետ։ Ինձ տեղեկացրին, որ խնդիր ունեմ «Քաղաքացիական պայմանագիր» խմբակցության մոտ երկու տասնյակ պատգամավորների հետ։ (…). Մարդիկ արդարադատության նախարարներից միշտ ակնկալել են արդարության արագ և անհապաղ վերականգնում։ Դա նախարարի գործառույթ չէ. Դա վերապահված է իրավապահներին և դատարաններին։ (…). Որոշեցի վերադառնալ ինձ ավելի ծանոթ միջավայր։ Արդարադատության ոլորտին կարելի է նպաստել նաեւ մասնավոր հատվածում»,- իր հայտարարության մեջ, մասնավորապես, նշել է Մինասյանը։