News - Սահմանի ցանկացած փոփոխություն անընդունելի է, Հայաստանի վարչապետին ասել է Իրանի առաջին փոխնախագահը

Վարչապետ Նիկոլ Փաշինյանն ընդունել է Իրանի առաջին փոխնախագահ Մոհամմադ Ռեզա Արեֆին, հայտնում են վարչապետի աշխատակազմից։ Վարչապետը նախ շնորհավորել է Արեֆին վերոնշյալ պաշտոնում նշանակվելու կապակցությամբ և մաղթել ամենայն բարիք հետագա գործունեության մեջ։ Այնուհետև Փաշինյանը նշել է, որ Իրանի հետ Հայաստանի հարաբերությունների շարունակական զարգացումը Հայաստանի կառավարության առաջնահերթություններից է։ Վարչապետը բարձր է գնահատել Իրանի սկզբունքային և հրապարակային դիրքորոշումը Հայաստանի տարածքային ամբողջականության և միջազգայնորեն ճանաչված պետական ​​սահմանների անբաժանելիության վերաբերյալ։ Մոհամմադ Ռեզա Արեֆն իր հերթին ևս մեկ անգամ ընդգծել է, որ Իրանը լիովին աջակցում է Հայաստանի տարածքային ամբողջականությանը և անընդունելի է համարում սահմանային ցանկացած փոփոխություն տարածաշրջանում։ Նա նաև ընդգծել է Հայաստանի հետ բազմաոլորտ համագործակցության Իրանի վճռականությունն ու պատրաստակամությունը։ Վարչապետ Փաշինյանն անդրադարձել է Հայաստան-Ադրբեջան խաղաղության պայմանագրի շուրջ բանակցությունների վերջին զարգացումներին, Հայաստանի կառավարության «Խաղաղության խաչմերուկ» նախագծին՝ ուղղված տարածաշրջանային ուղիների ապաշրջափակմանը և դրա սկզբունքներին։ Նա ընդգծել է, որ Հայաստանը պատրաստ է նպաստել շահագրգիռ երկրների առևտրատնտեսական հարաբերությունների զարգացմանը՝ ապաշրջափակելով ինքնիշխանության, իրավասության, իրավահավասարության և փոխադարձության սկզբունքների հիման վրա։ Իր հերթին Իրանի առաջին փոխնախագահն ընդգծել է, որ իր երկիրն աջակցում է Հայաստանի կառավարության «Խաղաղության խաչմերուկ» նախագծին։ Զրուցակիցները քննարկել են նաև երկկողմ առևտրատնտեսական հարաբերությունները և դրանց զարգացումը, համագործակցությունը էներգետիկայի, ենթակառուցվածքների, ճանապարհաշինության, զբոսաշրջության և մի շարք այլ ոլորտներում։ Կարծիքներ են փոխանակվել նաև փոխադարձ հետաքրքրություն ներկայացնող այլ հարցերի շուրջ։