News - Չաբահար նավահանգիստը պատրաստ է աշխատել ԵԱՏՄ բոլոր երկրների հետ

Հարեւան երկրների հետ առեւտրատնտեսական հարաբերությունների ընդլայնումը Իրանի առաջնահերթություններից է։ Այս մասին հայտարարել է Իրանի արդյունաբերության, հանքարդյունաբերության և առևտրի նախարար Սեյյեդ Մոհամմադ Աթաբակը Երևանում Եվրասիական երրորդ տնտեսական համաժողովի շրջանակում Իրանի և Եվրասիական տնտեսական միության (ԵԱՏՄ) համագործակցությանը նվիրված պանելային քննարկման ժամանակ։ Նրա խոսքով, դրա համար օգտագործվում են բոլոր տեսակի գործիքներ. Նախարարը կարևորել է լոգիստիկայի զարգացումը և նշել ֆինանսական մեխանիզմների կողմից դրված սահմանափակումները։ Աթաբակը ընդգծել է ազատ տնտեսական գոտու ստեղծման կարևորությունը՝ հավելելով, որ բազմաթիվ իրանցի ձեռնարկատերեր պատրաստակամություն են հայտնել միանալու ԵԱՏՄ շուկաներին։ Նախարարն ասաց, որ ազատ առևտրի գոտու ստեղծման մասին համաձայնագրի ստորագրումից հետո Հայաստանի հետ Իրանի առևտուրն աճել է երկուսուկես անգամ։ Ըստ նրա՝ այս ցուցանիշը լավ է, բայց հեռու է երկու երկրների ղեկավարների կողմից դրված նպատակներից՝ 3 մլրդ դոլար։ Առևտրի ներկայիս մակարդակը չի համապատասխանում ոչ Իրանի, ոչ Հայաստանի շահերին, և անհրաժեշտ է ապահովել, որ երկու երկրներն ավելի լավ ճանաչեն միմյանց շուկաները, ասել է Աթաբակը։  «Մյուս կողմից, մեր համագործակցությունը, մասնավորապես ներդրումները, անսահմանափակ են»,- հավելել է իրանցի պաշտոնյան։ Խոսելով լոգիստիկայի մասին՝ նախարարը հիշեցրեց, որ Իրանն ունի կարևոր լոգիստիկա, մասնավորապես՝ Չաբահար նավահանգիստը, և Իրանը լիովին աջակցում է Հայաստանի «Խաղաղության խաչմերուկ» նախագծին։ Սեյյեդ Մոհամմադ Աթաբաքի խոսքով՝ Չաբահար նավահանգիստը պատրաստ է աշխատել ԵԱՏՄ բոլոր երկրների հետ։ Նախարարը նաև նշել է տարանցիկ փոխադրումների մասին օրենսդրության վերանայման անհրաժեշտությունը։