News - Արարատ Միրզոյանը՝ Ժան Նոել Բարոյին. Հայաստան-Ֆրանսիա հարաբերությունները զարգանում են նոր բովանդակությամբ

Հայաստանի արտգործնախարար Արարատ Միրզոյանը չորեքշաբթի օրը Նյու Յորքում ՄԱԿ-ի Գլխավոր ասամբլեայի 79-րդ նստաշրջանի շրջանակում հանդիպել է Ֆրանսիայի Եվրոպայի և արտաքին գործերի նորանշանակ նախարար Ժան-Նոել Բարոյի հետ։ ԱԳՆ-ից NEWS.am -ին հայտնում են, որ Միրզոյանը նախ շնորհավորել է Բարոյին վերոնշյալ պաշտոնում նշանակվելու կապակցությամբ և հաջողություններ մաղթել այս նոր կարևոր առաքելության մեջ։ Հանդիպմանը քննարկվել է Հայաստանի և Ֆրանսիայի միջև համագործակցության օրակարգային հարցերի լայն շրջանակ։ Դրանք ներառում էին երկկողմ հարաբերությունները, Հայաստան-ԵՄ գործընկերության նոր օրակարգը, տարածաշրջանային զարգացումները։ Արարատ Միրզոյանը և Ժան-Նոել Բարոն քննարկել են նաև Հայաստանի և Ֆրանսիայի միջև փոխադարձ հետաքրքրություն ներկայացնող բոլոր ոլորտներում համագործակցության խորացմանն ուղղված համատեղ քայլերը։ «Հայաստանի և Ֆրանսիայի միջև հարաբերությունները զարգանում են նոր բովանդակությամբ, և մենք գնում ենք ռազմավարական բնույթի հարաբերությունների կառուցման»,- ընդգծեց արտգործնախարար Միրզոյանը։ Իսկ տարածաշրջանային համատեքստում մտքեր են փոխանակվել Հարավային Կովկասում և դրա շուրջ անվտանգության իրավիճակի և մարտահրավերների, ինչպես նաև տարածաշրջանում կայուն խաղաղության հաստատմանն ուղղված քայլերի շուրջ։