News - Սերժ Թանկյան. Հայերի վերադարձը Ղարաբաղ կարող են ապահովել միջազգային խաղաղապահ ուժերը

Աշխարհահռչակ երաժիշտ և երգահան Սերժ Թանկյանը, ամերիկահայ հայտնի System Of a Down ռոք խմբի ֆրոնտմեն, տեսաուղերձ է հրապարակել Facebook-ում, որում անդրադարձել է մեկ տարի առաջ Արցախից (Լեռնային Ղարաբաղ) հայերի բռնի տեղահանմանը. դա որակելով որպես «էթնիկ զտում»: Մեկ տարի առաջ այս օրը Լեռնային Ղարաբաղում տեղի ունեցավ էթնիկ զտում, և 120 հազար հայեր ադրբեջանական վարչակազմի կողմից բռնի տեղահանվեցին Արցախից՝ այն հողից, որտեղ ապրել են ավելի քան 2000 տարի։ Ինը ամիս տեւած պաշարումից եւ սովից հետո Ադրբեջանը հարձակվեց նրանց վրա։ Միջազգային քրեական դատարանի նախկին դատախազ Լուիս Մորենո Կամպոն Ադրբեջանի գործողությունները որակել է որպես «ցեղասպանություն»։ ՄԱԿ-ի միջազգային քրեական դատարանն իր հերթին մի քանի որոշումներ է կայացրել՝ նշելով Լեռնային Ղարաբաղի հայերի վերադարձի անհրաժեշտությունը։ Բայց նրանք չեն կարող վստահել Ադրբեջանին, մի երկրի, որն իրականացրել է էթնիկ զտումներ և սպանել բազմաթիվ հայերի` ցուցաբերելով ծայրահեղ ռասիզմ: Հայատյացությունը նույնիսկ նրանց ազգային քաղաքականությունն է, ասել է Թանկյանը։ Նրա համոզմամբ, սակայն, միջազգային խաղաղապահ ուժերը կարող են ապահովել հայերի վերադարձը Լեռնային Ղարաբաղ և նրանց անվտանգությունը։ Բայց դրա համար անհրաժեշտ է միջազգային հանրության, մասնավորապես՝ Եվրամիության ու ԱՄՆ-ի քաղաքական կամքը։ Այդ հարցում մեծ դեր կարող է խաղալ նաև ԵԱՀԿ-ն, ըստ Թանկյանի Հայերը չեն կարող կորցնել հայրենադարձության հույսը, հայրենիք վերադառնալու ցանկությունը։ Այն, ինչ տեղի ունեցավ, գաղութատիրության ամենավատ օրինակ էր, ներառյալ էթնիկ զտումները և ցեղասպանությունը: Արցախի հայությունը պետք է հնարավորություն ունենա վերադառնալու իրենց տները, ապրելու խաղաղ ու նորմալ պայմաններում։ Բոլորը պետք է կանգնեն նրանց կողքին, եզրափակեց Սերժ Թանկյանը։