News - Հայաստանի վարչապետը՝ ԱՄՀ պաշտոնյային. Մակրոտնտեսական կայունության պահպանումը մեզ համար առաջնահերթություն է

Վարչապետ Նիկոլ Փաշինյանն ընդունել է Արժույթի միջազգային հիմնադրամի (ԱՄՀ) հայաստանյան առաքելության ղեկավար Իվա Պետրովային։ Այս մասին հայտնում են վարչապետի աշխատակազմից։ Վարչապետը կարևորել է ԱՄՀ-ի հետ Հայաստանի համագործակցությունը՝ ի շահ տնտեսական զարգացման և երկրում կայունության պահպանման։ Հանդիպման ընթացքում զրուցակիցներն անդրադարձել են Հայաստանի բյուջետային, դրամավարկային և արժութային քաղաքականությանը, ինչպես նաև հարկային քաղաքականությանն ու վարչարարությանը։ Արժույթի միջազգային հիմնադրամի պաշտոնյան, իր հերթին, ընդգծել է Հայաստանի ֆինանսական հատվածի բարեփոխումների ընթացքը, ներդրումային միջավայրի բարելավումը և մի շարք այլ ոլորտներ՝ տնտեսական ակտիվությունը պահպանելու նպատակով։ Վարչապետն իր հերթին ընդգծել է, որ Հայաստանի կառավարության համար առաջնահերթություն է մակրոտնտեսական կայունության և երկարաժամկետ տնտեսական զարգացման պահպանումը, և որ համապատասխան միջոցառումներն ու բարեփոխումները լինելու են հետևողական։