News - Փաշինյանը՝ Կոբախիձեին. Հայաստանի կառավարությունը շահագրգռված է բարեկամ Վրաստանի հետ ռազմավարական համագործակցությամբ

ՀՀ վարչապետի աշխատակազմից NEWS.am-ին հայտնում են, որ երկուշաբթի օրը Վրաստանի մայրաքաղաք Թբիլիսիում տեղի է ունեցել Հայաստանի վարչապետ Նիկոլ Փաշինյանի և Վրաստանի վարչապետ Իրակլի Կոբախիձեի առանձնազրույցը, որին հաջորդել է ընդլայնված կազմով հանդիպումը։ Կոբախիձեն ողջունել է Հայաստանի վարչապետի պաշտոնական այցը և ընդգծել երկու երկրների միջև ռազմավարական հարաբերությունների հետևողական զարգացման կարևորությունը բոլոր ոլորտներում։ Վրաստանի վարչապետը նաև կարևորել է Հայաստանի հետ առևտրատնտեսական համագործակցությունը, գործարար կապերի ընդլայնումը, ենթակառուցվածքների զարգացումը։ Փաշինյանն իր հերթին շնորհակալություն է հայտնել ջերմ հյուրընկալության համար և նշել, որ բարձր մակարդակի փոխայցելությունների ինտենսիվությունը վկայում է երկու երկրների կառավարությունների՝ բազմակողմ համագործակցության ընդլայնման և ամրապնդման շահագրգռվածության մասին։ Նիկոլ Փաշինյանը նաև նշել է, որ Հայաստանի կառավարությունը շահագրգռված է բարեկամ Վրաստանի հետ ռազմավարական համագործակցությամբ և ընդգծել է տնտեսության, էներգետիկայի, զբոսաշրջության, կրթության, մշակույթի և մի շարք այլ ոլորտներում համատեղ նախագծերի իրականացումը։ Բացի այդ, կողմերը պատրաստակամություն են հայտնել շարունակել ենթակառուցվածքների զարգացման համատեղ ծրագրերի քննարկումները, ինչը կնպաստի նաև տարածաշրջանային համագործակցության ընդլայնմանը։ Վարչապետ Փաշինյանը վրացի գործընկերոջը մանրամասներ է փոխանցել Հայաստանի և Ադրբեջանի միջև խաղաղության պայմանագրի շուրջ քննարկումների, ինչպես նաև դրանց սահմանազատման գործընթացի վերաբերյալ։ Իրակլի Կոբախիձեն ողջունել է Հայաստանի և Ադրբեջանի միջև խաղաղությանն ուղղված քայլերը՝ ի նպաստ տարածաշրջանում խաղաղության և կայունության հաստատման և ամրապնդման։ Նաև Վրաստանի վարչապետը ևս մեկ անգամ հայտնել է իր երկրի պատրաստակամությունը՝ նպաստելու երկու հարևան երկրների միջև հարաբերությունների կարգավորմանը։