News - Փաշինյան. Փորձ է արվում ցույց տալ, որ նոյեմբերի 9-ի հայտարարությունը Ադրբեջան-Նախիջևան կապն ապահովելու մասին է.

Փորձ է արվում ցույց տալ, որ 2020 թվականի նոյեմբերի 9-ի հայտարարությունը Ադրբեջանի և Նախիջևանի միջև կապն ապահովելու մասին է, մինչդեռ 9-րդ կետը սկսվում է այսպես. «Տարածաշրջանի բոլոր տնտեսական և տրանսպորտային կապերը պետք է ապաշրջափակվեն»։ Այս մասին երեքշաբթի «Երևան երկխոսություն 2024» միջազգային համաժողովում ունեցած ելույթում ասաց ՀՀ վարչապետ Նիկոլ Փաշինյանը։ «Ադրբեջանի և Նախիջևանի միջև կապը 9-րդ կետի ենթաբովանդակային կետն է, մինչդեռ հիմնական բովանդակությունը վերաբերում է տարածաշրջանի բոլոր կապերի ապաշրջափակմանը։ Հայտարարության 7-րդ կետում ասվում է, որ ներքին տեղահանվածներն ու փախստականները պետք է վերադառնան Լեռնային Ղարաբաղի տարածք և հարակից շրջաններ՝ ՄԱԿ-ի Փախստականների հարցերով գերագույն հանձնակատարի գործակալության վերահսկողության ներքո։ Ինչպես տեսնում եք, այդ փաստաթղթի ստորագրումից հետո ոչ միայն Լեռնային Ղարաբաղից և հարակից շրջաններից հեռացած հայ փախստականները չեն վերադարձել, այլ ուղիղ մեկ տարի առաջ տեղի ունեցած իրադարձությունների արդյունքում Լեռնային Ղարաբաղն ամբողջությամբ հայաթափվել է։ [Ադրբեջանի կողմից] էթնիկ զտումների պատճառով»,- ասել է Հայաստանի վարչապետը։ Փաշինյանը հիշեցրեց, որ վերոնշյալ հայտարարության 8-րդ կետը վերաբերում է բոլոր ռազմագերիների, պատանդների և այլ կալանավորված անձանց, ինչպես նաև մահացածների դիակների վերադարձին։ «Մինչ այժմ Ադրբեջանում կան հայ գերիներ, պատանդներ և այլ կալանավորված անձինք, որոնք չեն վերադարձվել: Ցավոք, ոչ մի գործընկեր հիմք չունի Հայաստանին մեղադրելու նոյեմբերի 9-ի հայտարարության որևէ դրույթ չկատարելու մեջ: Ինչպես տեսնում եք. Հայաստանը հիմքեր ունի ասելու, որ եռակողմ հայտարարության մեր մյուս գործընկերները [այսինքն՝ Ադրբեջանն ու Ռուսաստանը] չեն կատարել իրենց պարտավորությունները»,- ընդգծել է ՀՀ վարչապետը։