News - Ադրբեջանը շարունակում է Ղարաբաղի իսլամացման քաղաքականությունը՝ նաև վիրտուալ տիրույթում

Արբանյակային քարտեզների մոնիտորինգը թույլ է տալիս ասել, որ ադրբեջանական կողմը սկսել է արհեստականորեն ավելացնել մզկիթների թիվը Արցախում (Լեռնային Ղարաբաղ), հայտնում է Արցախի հայկական մշակութային ժառանգության մոնիտորինգը իրականացնող MonumentWatch.org կայքը։ Մասնավորապես, Google Earth-ի միջոցով Հադրութի շրջանի գյուղերի մշտադիտարկման ժամանակ նկատելի է դարձել, որ Թաղասեր, Վարդաշատ, Կամակուչ, Սարինշեն, Ծամձոր, Տող գյուղերում մզկիթների առկայության մասին նշաններ են ավելացվել։ Ավելին, նշված գյուղերում այս ցուցանակները տեղադրված են կարծես կամայականորեն, քանի որ պատկերները մեծացնելու դեպքում կարող եք տեսնել, որ դրանք տեղադրված են անմիջապես գյուղի տների և բակերի վրա: Այս արբանյակային լուսանկարների դիտարկման ժամանակ պարզ է դարձել, որ մզկիթի գոյության մասին մարկեր է տեղադրվել նաև Ասկերան քաղաքում։ Ըստ այս քարտեզի՝ այն գտնվում է քաղաքային գերեզմանատան մոտ։ Ադրբեջանական կողմը շարունակում է Արցախի իսլամացման քաղաքականությունը՝ նաև վիրտուալ տիրույթում։ Մզկիթի այս ցուցանակները արհեստականորեն տեղադրվում են հանրությանը հասանելի կայքերում, որոնք ցուցադրում են արբանյակային պատկերներ: Հատկանշական է, որ այս քաղաքականության թիրախ է ընտրվել Հադրութի շրջանը, որի գյուղերի մեծ մասը հայկական էր, ուներ հայ բնակչություն, և դրանցում երբեք իսլամական աղոթատեղիներ չեն եղել։ Նկատելի է, որ Հադրութ քաղաքին ամենամոտ գյուղերը «օժտված» են եղել մզկիթներով։ Վերոնշյալ գյուղերը 2020 թվականի ադրբեջանական օկուպացիայից հետո բնակչություն չունեն, և այնտեղ շինարարական, առավել ևս մզկիթաշինական աշխատանքներ չկան։