News - Ուկրաինան ծրագրում է անժամկետ պահել Ռուսաստանի տարածքը, որը գրավել է, ասել է Զելենսկին

Ուկրաինայի նախագահ Վլադիմիր Զելենսկին երեքշաբթի օրը NBC News-ին տված հարցազրույցում ասել է, որ Կիևը ծրագրում է անժամկետ պահել ռուսական տարածքները, որոնք գրավել էր անցյալ ամիս անսպասելի ներխուժման արդյունքում՝ փորձելով ստիպել Ռուսաստանի նախագահ Վլադիմիր Պուտինին մոտենալ բանակցությունների սեղանին, հայտնում է NBC News-ը։ Զելենսկին նշել է, որ ռուսական այս տարածքների պահպանումը պատերազմի ավարտի ծրագրի անբաժանելի մասն է։ Կիևը շուտով կներկայացնի այդ ծրագիրը իր դաշնակիցներին, այդ թվում՝ Վաշինգտոնին, հավելել է նա։ «Առայժմ մեզ դա պետք է», - ասել է Զելենսկին այն տարածքի մասին, որն այժմ Ուկրաինան պահում է Ռուսաստանում: Ուկրաինայի նախագահը, սակայն, չի պատասխանել լրագրողի հարցին, թե արդյոք Ուկրաինան պատրաստվում է ավելի շատ ռուսական հողեր գրավել։ «Ես չեմ ասի, կներեք», - ասել է Զելենսկին։ «Ամենայն հարգանքով, ես չեմ կարող խոսել այդ մասին. Կարծում եմ՝ հաջողությունը շատ մոտ է անակնկալին»։ Ուկրաինայի զինված ուժերը, որոնք օգոստոսի 6-ին անսպասելի և արագ հարձակում են իրականացրել Ռուսաստանի Կուրսկի շրջանի վրա, ներկայումս վերահսկում են շրջանի մոտ 1300 քառակուսի կիլոմետր տարածք և 100 բնակավայր։ Իսկ օգոստոսի 29-ին հայտնի դարձավ, որ ուկրաինացի զինվորականները շրջապատել են 3000 ռուս զինվորի։