News - Հայաստանը բարձր է գնահատում Ուրուգվայի խորհրդարանի սկզբունքային դիրքորոշումը համամարդկային արժեքների պաշտպանության հարցում

Հայաստանի արտգործնախարար Արարատ Միրզոյանն ուրբաթ օրը հանդիպել է Ուրուգվայի Ներկայացուցիչների պալատի նախագահ Անա Օլիվերայի հետ։ Հայաստանի ԱԳՆ-ից NEWS.am -ին հայտնում են, որ հանդիպմանը մասնակցել է նաև Ուրուգվայի Ներկայացուցիչների պալատի փոխնախագահ, ուրուգվահայ Պեդրո Ջիսդոնյանը։ Որպես մարտին Ուրուգվայի մայրաքաղաք Մոնտեվիդեո կատարած ՀՀ ԱԳ նախարարի այցի ընթացքում կայացած քննարկումների շարունակություն՝ Միրզոյանն ու Օլիվերան անդրադարձել են տարբեր ոլորտներում գործընկերության խորացմանն ուղղված քայլերին և երկու երկրների բարձր մակարդակի քաղաքական երկխոսությանը և բարեկամական կապերին համահունչ։ . Զրուցակիցները մատնանշել են այն ոլորտները, որտեղ առկա է համագործակցության զարգացման զգալի ներուժ, և պատրաստակամություն հայտնել նպաստել այդ ուղղությամբ համագործակցության հետագա զարգացմանը։ Միրզոյանն ընդգծել է նաև բարձրաստիճան այցելությունների աճող դինամիկան, ինչպես նաև Հայաստանի և Ուրուգվայի խորհրդարաններում բարեկամական խմբերի ակտիվ դերը երկու երկրների միջև համագործակցության օրակարգի ընդլայնման գործում։ «Հայաստանը բարձր է գնահատում Ուրուգվայի խորհրդարանի դրսևորած սկզբունքային դիրքորոշումը միջազգային իրավունքի հիմնարար սկզբունքների, մարդու իրավունքների և համամարդկային արժեքների պաշտպանության հարցերում»,- հավելեց արտգործնախարարը։ Հանդիպմանը քննարկվել են նաև Հայաստանի տարածաշրջանային խնդիրներ։ Այդ կապակցությամբ Հայաստանի արտգործնախարարը ներկայացրել է Հայաստանի և Ադրբեջանի միջև հարաբերությունների կարգավորման գործընթացի վերջին զարգացումները և կարևորել երկու երկրների միջև խաղաղության պայմանագրի ստորագրումը տարածաշրջանային կայունության և երկարաժամկետ խաղաղության ապահովման համատեքստում։