Քաղաքացիական ծառայողները չպետք է օգտագործեն մեսենջերները պաշտոնական նպատակներով. Այս մասին լրագրողներին հայտնել է ՌԴ նախագահի մամուլի քարտուղար Դմիտրի Պեսկովը՝ մեկնաբանելով Ֆրանսիայում Telegram-ի հիմնադիր Պավել Դուրովի ձերբակալության հետ կապված իրավիճակը, փոխանցում է ՏԱՍՍ-ը։ Պեսկովի խոսքով՝ ոչ մի մեսենջեր, այդ թվում՝ Telegram-ը, վստահելի չէ տեղեկատվական անվտանգության տեսանկյունից։ Նա հավելել է, որ ՌԴ նախագահի աշխատակազմը հետեւում է այդ կանոնին։ «Մենք ոչ մի մեսենջեր չենք օգտագործում պաշտոնական նպատակներով, քանի որ դա կլինի պաշտոնական կանոնների և պաշտոնական էթիկայի խախտում»,- ասել է Պեսկովը։ Telegram-ի հիմնադիր Պավել Դուրովին օգոստոսի 24-ին բերման են ենթարկել Փարիզ-Լե Բուրժե օդանավակայանում, հաջորդ օրը նրա կալանքը երկարացվել է 96 ժամով։ Փարիզի դատախազությունը նրան մեղադրում է թմրամիջոցների ապօրինի շրջանառությանը մեղսակցության, երեխաների դեմ հանցագործությունների, խարդախության մեջ։ Այսինքն, ըստ էության, նա դիտվում է որպես Telegram-ի միջոցով այս և այլ իրավախախտումներ կատարողների հանցակից։