Ֆրանսիայի դատական իշխանությունները կիրակի օրը 48 ժամով երկարացրել են ռուսաստանյան Telegram-ի հիմնադիր և ղեկավար Պավել Դուրովի կալանքը, հայտնել է հետաքննությանը մոտ կանգնած աղբյուրը, փոխանցում է AFP-ն։ Այս կալանքը կարող է տեւել առավելագույնը 96 ժամ, որից հետո դատավորը պետք է կա՛մ ազատի Դուրովին, կա՛մ մեղադրանք առաջադրի։ Bloomberg-ը հայտնել էր նաև, որ Telegram-ի հիմնադրի կալանքը կարող է երկարաձգվել։ Ֆրանսիական օրենսդրության համաձայն՝ կալանքը կարող է երկարաձգվել միայն մեկ անգամ։ Ֆրանսիայի իշխանությունները Դուրովի գործի վերաբերյալ պաշտոնական մեկնաբանություն չեն տվել։ Միայն Telegram-ի թիմն է մեկնաբանություն տարածել, որտեղ ասվում է, որ ընկերության գործադիր տնօրենը թաքցնելու ոչինչ չունի, որ նա հաճախ է շրջում Եվրոպայով, և որ Telegram-ը համապատասխանում է ԵՄ օրենքներին, այդ թվում՝ թվային ծառայությունների մասին օրենքին։ Անհեթեթ է պնդել, որ հարթակը կամ դրա սեփականատերը պատասխանատվություն է կրում այդ հարթակի չարաշահման համար, ընդգծվում է կիրակնօրյա մեկնաբանության մեջ։ Նաև նշվում է, որ ամբողջ աշխարհում մոտ մեկ միլիարդ օգտատերեր օգտագործում են Telegram-ը որպես հաղորդակցության միջոց և կարևոր տեղեկատվության աղբյուր։ Օգոստոսի 24-ի երեկոյան ֆրանսիական լրատվամիջոցները հայտնել են, որ Telegram-ի հիմնադիր Պավել Դուրովը Ֆրանսիա ժամանելուն պես ձերբակալվել է Փարիզ-Լե Բուրժե օդանավակայանում։ Նա հարցաքննվել է և բերման է ենթարկվել։ Դուրովն Ադրբեջանից ժամանել էր մասնավոր ինքնաթիռով։