Հայաստանի արտաքին գործերի նախարար Արարատ Միրզոյանն ուրբաթ հեռախոսազրույց է ունեցել Իրանի նոր ԱԳ նախարար Սեյեդ Աբբաս Արաղչիի հետ, հայտնում է ՀՀ արտաքին գործերի նախարարության մամուլի ծառայությունը։ Միրզոյանը նախ շնորհավորել է Արաղչիին Իրանի ԱԳ նախարարի պաշտոնում նշանակվելու կապակցությամբ և հաջողություն մաղթել նոր կարևոր առաքելությունում։ Այնուհետև զրուցակիցները քննարկել են Հայաստանի և Իրանի միջև երկկողմ հարաբերությունների օրակարգը՝ ընդգծելով երկու կողմերի պատրաստակամությունը՝ շարունակական ջանքեր գործադրելու փոխադարձ հետաքրքրություն ներկայացնող ոլորտներում բարեկամական կապերի և ամուր գործընկերության հետագա ամրապնդման ուղղությամբ։ Անդրադարձ է կատարվել նաև առաջիկա ծրագրերին։ Արարատ Միրզոյանը նաև նշել է, որ հայկական կողմը բարձր է գնահատում Իրանի ամուր դիրքորոշումը Հայաստանի ինքնիշխանության և տարածքային ամբողջականության անձեռնմխելիության հարցում։