News - Արցախի ողջ բնակչությունն արդեն 12 ժամից ավելի հոսանքազրկված է

Ադրբեջանի կողմից Մարտակերտի շրջանում բարձրավոլտ էլեկտրացանցերի թիրախավորման արդյունքում սեպտեմբերի 19-ից՝ ժամը 14:30-ի սահմաններում, Արցախի ողջ բնակչությունն արդեն 12 ժամից ավելի զրկված է էլեկտրաէներգիայից։ Այս մասին Արցախի ՄԻՊ Գեղամ Ստեփանյանը հայտնել է X (նախկին Twitter) իր էջին։ «Կենսական ենթակառուցվածքների կանխամտածված թիրախավորումը, որն ավելի շատ տառապանքներ ու զրկանքներ է պատճառում խաղաղ բնակչությանը, Ադրբեջանի հերթական ահաբեկչական գործողությունն է»,- գրել է նա։ Ինչպես ավելի վաղ հայտնել էր NEWS.am-ը, սեպտեմբերի 19-ին՝ ժամը 13.00-ից, Լեռնային Ղարաբաղի շփման գծի ողջ երկայնքով Ադրբեջանի զինված ուժերը հրետանային կրակ են բացել՝ փորձելով ճեղքել Լեռնային Ղարաբաղի պաշտպանության ուժերի պաշտպանական գիծը։ Այս պահին Լեռնային Ղարաբաղի մայրաքաղաք Ստեփանակերտը և այլ բնակավայրեր ենթարկվում են ուժեղ հրետակոծությունների։ Լեռնային Ղարաբաղի Մարդու իրավունքների պաշտպան Գեղամ Ստեփանյանը արձանագրել է բազմաթիվ զոհեր և վիրավորներ խաղաղ բնակիչների, այդ թվում՝ երեխաների շրջանում։ Սեպտեմբերի 20-ի դրությամբ Լեռնային Ղարաբաղի շփման գծում տարբեր ինտենսիվությամբ մարտերը շարունակվում են։ Ադրբեջանի զինված ուժերի ստորաբաժանումները տարբեր զինատեսակներ են օգտագործում ոչ միայն իրենց դիրքային առաջխաղացումը պահպանելու, այլև քաղաքացիական ենթակառուցվածքները թիրախավորելու համար։