News - Բրազիլիան կոչ է անում երկխոսել Ղարաբաղի հարցում ԵՄ-ի, Մոսկվայի և ԱՄՆ-ի միջնորդությամբ

Բրազիլիայի կառավարությունը մտահոգությամբ է հետևում Լեռնային Ղարաբաղում տեղի ունեցող իրադարձություններին, հատկապես՝ հաշվի առնելով դրա ազդեցությունը խաղաղ բնակչության վրա և կոչ է անում խաղաղ երկխոսության գնալ ԵՄ-ի, Մոսկվայի և ԱՄՆ-ի միջնորդությամբ։ հաղորդում է հարավամերիկյան երկիրը։ «Բրազիլիայի կառավարությունը մեծ մտահոգությամբ է հետևում Լեռնային Ղարաբաղում լարվածության վերսկսմանը, հատկապես՝ հաշվի առնելով դրա ազդեցությունը խաղաղ բնակչության վրա։ Բրազիլիայի կառավարությունը կրկնում է, որ տեւական լուծման լավագույն ուղին խաղաղ երկխոսությունն է, հատկապես երեք ընթացիկ բանակցային հարթակների միջոցով (Բրյուսել, Մոսկվա և Վաշինգտոն): Բրազիլիան ՄԱԿ-ի Անվտանգության խորհրդի մյուս անդամների հետ միասին կշարունակի ուշադիր հետևել Լեռնային Ղարաբաղում հումանիտար և անվտանգության իրավիճակին»,- ասվում է Բրազիլիայի ԱԳՆ կայքում։ Ինչպես ավելի վաղ հայտնել էր NEWS.am-ը, սեպտեմբերի 19-ին՝ ժամը 13.00-ից, Լեռնային Ղարաբաղի շփման գծի ողջ երկայնքով Ադրբեջանի զինված ուժերը հրետանային կրակ են բացել՝ փորձելով ճեղքել Լեռնային Ղարաբաղի պաշտպանության ուժերի պաշտպանական գիծը։ Այս պահին Լեռնային Ղարաբաղի մայրաքաղաք Ստեփանակերտը և այլ բնակավայրեր ենթարկվում են ուժեղ հրետակոծությունների։ Լեռնային Ղարաբաղի Մարդու իրավունքների պաշտպան Գեղամ Ստեփանյանը արձանագրել է բազմաթիվ զոհեր և վիրավորներ խաղաղ բնակիչների, այդ թվում՝ երեխաների շրջանում։ Սեպտեմբերի 20-ի դրությամբ Լեռնային Ղարաբաղի շփման գծում տարբեր ինտենսիվությամբ մարտերը շարունակվում են։ Ադրբեջանի զինված ուժերի ստորաբաժանումները տարբեր զինատեսակներ են օգտագործում ոչ միայն իրենց դիրքային առաջխաղացումը պահպանելու, այլև քաղաքացիական ենթակառուցվածքները թիրախավորելու համար։