News - Արարատ Միրզոյանը ՄԱԿ-ի Գլխավոր ասամբլեայի ժամանակ հանդիպել է Ժոզեպ Բորելի հետ

Նյու Յորքում ՄԱԿ-ի Գլխավոր ասամբլեայի շրջանակներում Հայաստանի արտգործնախարար Արարատ Միրզոյանը հանդիպել է ԵՄ արտաքին գործերի և անվտանգության բարձր ներկայացուցիչ Ժոզեպ Բորելի հետ։ Քննարկման ընթացքում երկու պաշտոնյաներն ընդգծել են, որ Ադրբեջանի գործողությունները Լեռնային Ղարաբաղում ուղղակիորեն հակասում են միջազգային իրավունքի հիմնարար նորմերին և հստակ ուղղված են Լեռնային Ղարաբաղի ժողովրդին հայրենիքից զրկելուն։ Արարատ Միրզոյանն իր միկրոբլոգում այդ հարցի վերաբերյալ իր տեսակետն է հայտնել՝ նշելով. «Միջազգային գործընկերները, այդ թվում՝ ԵՄ-ն, պետք է շտապ քայլեր ձեռնարկեն՝ կանխելու համար»։ Ինչպես ավելի վաղ հայտնել էր NEWS.am-ը, սեպտեմբերի 19-ին՝ ժամը 13.00-ից, Լեռնային Ղարաբաղի շփման գծի ողջ երկայնքով Ադրբեջանի զինված ուժերը հրետանային կրակ են բացել՝ փորձելով ճեղքել Լեռնային Ղարաբաղի պաշտպանության ուժերի պաշտպանական գիծը։ Այս պահին Լեռնային Ղարաբաղի մայրաքաղաք Ստեփանակերտը և այլ բնակավայրեր ենթարկվում են ուժեղ հրետակոծությունների։ Լեռնային Ղարաբաղի Մարդու իրավունքների պաշտպան Գեղամ Ստեփանյանը արձանագրել է բազմաթիվ զոհեր և վիրավորներ խաղաղ բնակիչների, այդ թվում՝ երեխաների շրջանում։ Սեպտեմբերի 20-ի դրությամբ Լեռնային Ղարաբաղի շփման գծում տարբեր ինտենսիվությամբ մարտերը շարունակվում են։ Ադրբեջանի զինված ուժերի ստորաբաժանումները տարբեր զինատեսակներ են օգտագործում ոչ միայն իրենց դիրքային առաջխաղացումը պահպանելու, այլև քաղաքացիական ենթակառուցվածքները թիրախավորելու համար։