News - Գերմանիայի կանցլեր Շոլցը ՄԱԿ-ի Գլխավոր ասամբլեայում կոչ է արել դադարեցնել ռազմական գործողությունները Լեռնային Ղարաբաղում.

Գերմանիայի կանցլեր Օլաֆ Շոլցը ՄԱԿ-ի Գլխավոր ասամբլեայի ամբիոնից կոչ է արել դադարեցնել ռազմական գործողությունները Լեռնային Ղարաբաղում։ «Իմ մտքերը Լեռնային Ղարաբաղի ժողովրդի հետ են։ Մինչ մենք խոսում ենք, վերսկսված պայքարը, որը տանում է դեպի փակուղի, պետք է ավարտվի», - ասել է Շոլցը: Իր X (նախկին Twitter) հաշվում նա գրել է. «Լեռնային Ղարաբաղում ռազմական գործողությունները պետք է անհապաղ դադարեցվեն. Ադրբեջանի և Հայաստանի միջև իրավիճակը շատ ճգնաժամային է. Բաքվի կառավարությունը պետք է անհապաղ դադարեցնի հարձակումները և վերադառնա դիվանագիտության՝ խաղաղ լուծման հասնելու համար»։ Ինչպես ավելի վաղ հայտնել էր NEWS.am-ը, սեպտեմբերի 19-ին՝ ժամը 13.00-ից, Լեռնային Ղարաբաղի շփման գծի ողջ երկայնքով Ադրբեջանի զինված ուժերը հրետանային կրակ են բացել՝ փորձելով ճեղքել Լեռնային Ղարաբաղի պաշտպանության ուժերի պաշտպանական գիծը։ Այս պահին Լեռնային Ղարաբաղի մայրաքաղաք Ստեփանակերտը և այլ բնակավայրեր ենթարկվում են ուժեղ հրետակոծությունների։ Լեռնային Ղարաբաղի Մարդու իրավունքների պաշտպան Գեղամ Ստեփանյանը արձանագրել է բազմաթիվ զոհեր և վիրավորներ խաղաղ բնակիչների, այդ թվում՝ երեխաների շրջանում։ Սեպտեմբերի 20-ի դրությամբ Լեռնային Ղարաբաղի շփման գծում տարբեր ինտենսիվությամբ մարտերը շարունակվում են։ Ադրբեջանի զինված ուժերի ստորաբաժանումները տարբեր զինատեսակներ են օգտագործում ոչ միայն իրենց դիրքային առաջխաղացումը պահպանելու, այլև քաղաքացիական ենթակառուցվածքները թիրախավորելու համար։