News - ՄԱԿ-ի գլխավոր քարտուղարը կոչ է արել «անհապաղ դադարեցնել» մարտերը Լեռնային Ղարաբաղում.

ՄԱԿ-ի գլխավոր քարտուղար Անտոնիո Գուտերեշը կոչ է արել «անհապաղ դադարեցնել մարտերը» Լեռնային Ղարաբաղում (Արցախ): «Գլխավոր քարտուղարը չափազանց մտահոգված է տարածաշրջանում ռազմական ուժի կիրառմամբ և զոհերի մասին հաղորդումներով, այդ թվում՝ խաղաղ բնակչության շրջանում: Նա ցավում է, որ այս մտահոգիչ զարգացումները հաջորդում են սեպտեմբերի 18-ին տեղի բնակչությանը այդքան անհրաժեշտ մարդասիրական օգնության տրամադրմանը: Գլխավոր քարտուղարը խստորեն կոչ է անում անհապաղ դադարեցնել մարտերը, ապաէսկալացիան և 2020 թվականի հրադադարի և միջազգային մարդասիրական իրավունքի սկզբունքների խստագույն պահպանումը։ Նա շարունակում է մտահոգված լինել տեղում հումանիտար իրավիճակով և կրկնում է իր կոչը՝ շտապ քայլեր ձեռնարկել՝ հեշտացնելու հումանիտար դերակատարների լիարժեք հասանելիությունը կարիքավոր մարդկանց: Նա կողմերին կոչ է անում վերակենտրոնանալ տարածաշրջանում վստահության ամրապնդման և երկարաժամկետ խաղաղության ապահովմանն ուղղված ջանքերի վրա»,- ասված է ՄԱԿ-ի գլխավոր քարտուղարի հաղորդագրությունում: Ինչպես ավելի վաղ հայտնել էր NEWS.am-ը, սեպտեմբերի 19-ին՝ ժամը 13.00-ից, Լեռնային Ղարաբաղի շփման գծի ողջ երկայնքով Ադրբեջանի զինված ուժերը հրետանային կրակ են բացել՝ փորձելով ճեղքել Լեռնային Ղարաբաղի պաշտպանության ուժերի պաշտպանական գիծը։ Այս պահին Լեռնային Ղարաբաղի մայրաքաղաք Ստեփանակերտը և այլ բնակավայրեր ենթարկվում են ուժեղ հրետակոծությունների։ Լեռնային Ղարաբաղի Մարդու իրավունքների պաշտպան Գեղամ Ստեփանյանը արձանագրել է բազմաթիվ զոհեր և վիրավորներ խաղաղ բնակիչների, այդ թվում՝ երեխաների շրջանում։ Սեպտեմբերի 20-ի դրությամբ Լեռնային Ղարաբաղի շփման գծում տարբեր ինտենսիվությամբ մարտերը շարունակվում են։ Ադրբեջանի զինված ուժերի ստորաբաժանումները տարբեր զինատեսակներ են օգտագործում ոչ միայն իրենց դիրքային առաջխաղացումը պահպանելու, այլև քաղաքացիական ենթակառուցվածքները թիրախավորելու համար։