News - Քննարկվել են Հայաստան-Վիետնամ ուղիղ չվերթների հնարավորությունները, վիզային ռեժիմի ազատականացումը

Վիետնամում Հայաստանի դեսպան Սուրեն Բաղդասարյանը երկուշաբթի հանդիպել է Վիետնամի արտաքին գործերի նախարար Բույ Թան Սոնի հետ, հայտնում են Վիետնամում ՀՀ դեսպանությունից։ Զրուցակիցները քննարկել են հարաբերությունների ընդլայնումը տնտեսական, քաղաքական, կրթական, մշակութային և մի շարք այլ ոլորտներում։ Երկուստեք ընդգծվել է բարձր մակարդակի փոխայցելությունների կարևորությունը երկկողմ հարաբերությունների դինամիկ զարգացման համար։ Ներկայացնելով հայկական կողմի մոտեցումները Հայաստանի կառավարության «Խաղաղության խաչմերուկ» ծրագրի շրջանակներում տարածաշրջանային համագործակցության վերաբերյալ՝ դեսպան Բաղդասարյանը կարևորել է Վիետնամի հետ Հայաստանի հարաբերությունների ամրապնդումը միջազգային և տարածաշրջանային ձևաչափերում։ Հանդիպմանն անդրադարձ է եղել նաև երկու երկրների քաղաքացիների համար վիզային ռեժիմի ազատականացմանը, զբոսաշրջության խթանմանը, Հայաստանի և Վիետնամի միջև ուղիղ չվերթների իրականացմանը։