News - Արարատ Միրզոյանը՝ Բուջար Օսմանի. ԵԱՀԿ-ն պետք է շտապ գործարկի համապատասխան մեխանիզմներ

Հայաստանի արտգործնախարար Արարատ Միրզոյանը Նյու Յորքում ՄԱԿ-ի Գլխավոր ասամբլեայի 78-րդ նստաշրջանի շրջանակում երեքշաբթի հանդիպել է ԵԱՀԿ գործող նախագահ, Հյուսիսային Մակեդոնիայի արտաքին գործերի նախարար Բուջար Օսմանիի հետ։ Հանդիպման առանցքում եղել են անվտանգության և հումանիտար ամենալուրջ խնդիրները, որոնք ի հայտ են եկել երեքշաբթի օրվանից Լեռնային Ղարաբաղի ժողովրդի դեմ Ադրբեջանի կողմից իրականացվող լայնածավալ ռազմական ագրեսիայի հետևանքով, հայտնում է Հայաստանի արտաքին գործերի նախարարությունը։ NEWS.am. ԱԳ նախարար Միրզոյանը նշեց, որ Ադրբեջանը, առաջնորդվելով անպատժելիության զգացումով, միջազգային կազմակերպությունների կողմից զսպող քայլերի բացակայությունն ընկալում է որպես ամենաթողություն և ձգտում է բացահայտ ուժի կիրառմամբ իրականացնել հայկական էթնիկ զտումներ Լեռնային Ղարաբաղում։ Հայաստանի արտգործնախարարը նաև ընդգծել է ԵԱՀԿ համապատասխան մեխանիզմների հրատապ գործարկման կարևորությունը։