Իսլամական հեղափոխության պահապանների կորպուսի (ԻՀՊԿ) հրամանատար, գեներալ-մայոր Հոսեյն Սալամին իր ցավակցությունն է հայտնել Բեյրութում իսրայելական կործանիչների կողմից վերջերս իրականացված ավիահարվածի հետևանքով սպանված իրանցի ռազմական խորհրդական Միլադ Բեդիի մահվան կապակցությամբ, հայտնում է Tasnim-ը։ «Ես իմ ցավակցությունն եմ հայտնում Սիրիայում և Լիբանանում Իրանի ռազմական խորհրդական Միլադ Բեդիի ընտանիքին և ընկերներին, ով նահատակվել է Բեյրութում Սիոնիստական ռեժիմի (իսրայելական) ահաբեկչական ավիահարվածի ժամանակ»,- ասված է Սալամինի հայտարարության մեջ։ Երեքշաբթի երեկոյան իսրայելական բանակը հայտարարեց Բեյրութի վրա հարձակման մասին, ապա հաստատեց, որ այս նպատակային գործողության արդյունքում սպանվել է Հեզբոլլահի ավագ հրամանատար Սայեդ Ֆուադ Ալի Շոկրը։ Ըստ իսրայելական զինվորականների՝ Շոկրը Հեզբոլլահի առաջնորդ Հասան Նասրալլայի աջ ձեռքն էր և պատասխանատու էր շարժման ռազմական կազմակերպության ռազմավարական հարցերի, այդ թվում՝ հրթիռային զենքի համար։ Չորեքշաբթի օրը SNN-ը հայտնել է, որ Շոկրի հետ սպանվածների թվում է նաև իրանցի ռազմական խորհրդական Միլադ Բեդին։