Հայաստանի Հանրապետությունը հավատարիմ է Հայաստանի և Թուրքիայի միջև հարաբերությունների կարգավորման գործընթացի շրջանակներում ձեռք բերված բոլոր պայմանավորվածությունների իրականացմանը, և նույնն է ակնկալում Անկարայից։ Այս մասին Sputnik Արմենիայի գրավոր հարցմանն ի պատասխան ասաց Հայաստանի արտաքին գործերի նախարարությունը։ Հայաստանի ԱԳՆ-ն պարզաբանել է, որ Երևանն Անկարայից ակնկալում է նույն հանձնառությունն ու պատրաստակամությունը, ներառյալ երրորդ երկրների քաղաքացիների և դիվանագիտական անձնագրեր ունեցող անձանց համար հայ-թուրքական ցամաքային սահմանի բացումը։ Ինչ վերաբերում է Հայաստանի և Թուրքիայի հատուկ ներկայացուցիչների հաջորդ հանդիպմանը՝ երկու երկրների միջև հարաբերությունների կարգավորման գործընթացի վերաբերյալ, ապա ՀՀ ԱԳՆ-ն նշել է, որ այդ հարցում հստակ պայմանավորվածության դեպքում հանրությունը կտեղեկացվի ժամանակին։