Բուլղարիայի Էլին Պելին քաղաքի հրավառության պահեստում պայթյուն է տեղի ունեցել, որից հետո ուժեղ հրդեհ է բռնկվել, հայտնում է Nova.bg-ն։ Ծանր վնասվածքներով երկու հոգի հոսպիտալացվել են։ Ավելի ուշ նրանցից մեկը, ով այս պահեստի սեփականատերն էր, հիվանդանոցում մահացել է։ Եվս մեկ տուժած ունի 85 տոկոս այրվածքներ։ Իրավապահ մարմինները նշում են, որ պահեստում դեռ երկու մարդ կա։ Պայթյունը տեղի է ունեցել հինգշաբթի, սակայն հրդեհը շարունակվում է ուրբաթ առավոտյան։ Լսվում են նաեւ պայթյուններ։ Տարածքի վրայով անօդաչու թռչող սարքը շարունակում է թռչել՝ հետևելու, թե երբ կդադարեն պայթյունները, որպեսզի փրկարարները սկսեն մարել կրակը։ Հայտարարվել է մոտակա շրջաններից բնակիչների տարհանում։ Քաղաքի ելքերից մեկում մեքենաների հերթեր են գոյացել՝ անգամ մայրաքաղաք Սոֆիայի ուղղությամբ։ Իրավապահ մարմինները կատարվածի վերաբերյալ դեռևս որևէ տեսություն չեն հրապարակել։ Հրդեհը մարելուց հետո կսկսվի հետաքննություն։ Բուլղարիայի ներքին գործերի նախարարության տվյալներով՝ այս պահեստն ուներ անվտանգության բոլոր միջոցները։ Տարիների ընթացքում այնտեղ բազմաթիվ ստուգումներ են իրականացվել, որոնք անվտանգության խախտումներ չեն հայտնաբերել։ Վերջին ստուգումն այնտեղ անցկացվել է մոտ երկու ամիս առաջ։