News - Մակրոնը՝ Հայաստանի հետ ռազմական համագործակցության մասին. Բաքուն զինվեց շատ ավելի լավ, քան Երևանը

Գործընկերներին ինքնապաշտպանության համար զենք և զինամթերք մատակարարելը նորմալ է։ Այս մասին Լոնդոնում Եվրոպական քաղաքական համայնքի գագաթնաժողովի շրջանակում կայացած մամուլի ասուլիսում ասել է Ֆրանսիայի նախագահ Էմանուել Մակրոնը՝ մեկնաբանելով Հայաստանին զենքի մատակարարման մասին ադրբեջանցի լրագրողի հարցը։ «Նորմալ է արձագանքել ինքնիշխան երկրի խնդրանքին, որը ցանկանում է զինվել՝ զգալով, որ կարող է ագրեսիայի ենթարկվել այլ պետության կողմից։ Եվ ես երբեք չեմ լսել վարչապետ Փաշինյանից, որ նա պատերազմի կամ ագրեսիայի որևէ ծրագիր ունի։ », - ասել է Ֆրանսիայի ղեկավարը: Ինչպես նշել է Մակրոնը, Ադրբեջանը վերջին տասնամյակում շատ ավելի լավ է զինվում, քան Հայաստանը։ «Եթե նայեք, վերջին տասնամյակում Ադրբեջանը կարծես թե շատ ավելի լավ է զինվում, քան Հայաստանը։ Եվ եթե հիշողությունս չի դավաճանում (ուղղեք ինձ, եթե սխալվում եմ), Ադրբեջանն էր, որ սարսափելի պատերազմ սկսեց 2020 թվականին։ Ֆրանսիայի նախագահն ընդգծել է, որ եթե Երևանն ու Բաքուն ավարտեն խաղաղության պայմանագիրը, ապա Փարիզը կաջակցի դրան։ «Կարծում եմ, որ ռազմական տեսանկյունից ցանկացած երկրի հետ համագործակցությունը միանգամայն նորմալ երեւույթ է երկու ինքնիշխան պետությունների միջազգային կյանքում։  Հայաստանի հեռանկարը խաղաղություն է, Ֆրանսիայի հեռանկարը՝ խաղաղություն. Ես իսկապես հույս ունեմ, որ Ադրբեջանի հեռանկարը նույնպես խաղաղությունն է։ Եվ եթե երկու երկրներն ավարտեն խաղաղ համաձայնագիրը, մենք կաջակցենք դրան»,- եզրափակել է Մակրոնը։