News - Մակրոնն ասել է, որ Օրբանը Ռուսաստանի հետ բանակցել է ոչ թե ԵՄ-ի անունից

Հունգարիայի վարչապետ Վիկտոր Օրբանի բանակցությունները Ռուսաստանի և Չինաստանի հետ Ուկրաինայի հարցով նրա անձնական նախաձեռնությունն են, ԵՄ-ն նրան իր անունից բանակցելու մանդատ չի տվել։ Այս մասին Վաշինգտոնում ՆԱՏՕ-ի գագաթնաժողովի շրջանակում կայացած մամուլի ասուլիսում հայտարարել է Ֆրանսիայի նախագահ Էմանուել Մակրոնը։ «Դա վերաբերում է միայն Հունգարիային, նա բանակցելու մանդատ չի ստացել»,- ասաց նա։ Նախագահը հավելել է, որ դա անձամբ է քննարկել Հունգարիայի վարչապետի հետ։ Նա ասաց, որ Օրբանը կառավարության օրինական ղեկավար է, ով «անկախ է իր դիվանագիտության մեջ»: «Նա այցելել է այս երկրներ՝ որպես Հունգարիայի վարչապետ, դա շատ օգտակար է, դա նրա ընտրությունն է»,- նշել է Մակրոնը։ «Այս այցերը կատարելով՝ նա մեզ [ԵՄ-ին] ոչ մի բանի չի պարտավորեցնում, քանի որ նա մեզ ոչ մի բանի մասին նախապես չի զգուշացրել»։ Հուլիսի 5-ին Օրբանն այցելել է Մոսկվա, որտեղ հանդիպել է ՌԴ նախագահ Վլադիմիր Պուտինի հետ և քննարկել Ուկրաինայի հակամարտության կարգավորման հնարավոր ուղիներն ու խաղաղ բանակցությունների մեկնարկը։ Ավելի ուշ վարչապետը մեկնել է Պեկին, որտեղ հանդիպել է Չինաստանի նախագահ Սի Ցզինպինի հետ։ Ռուսաստան այցից առաջ Օրբանը հուլիսի 2-ին Կիևում այդ երկրի նախագահ Վլադիմիր Զելենսկու հետ քննարկել է Ուկրաինայի հակամարտության կարգավորման հարցը։