News - Լեռնային Ղարաբաղից բռնի տեղահանվածները բողոքի ցույց են անում ՄԱԿ-ի գրասենյակի դիմաց

Լեռնային Ղարաբաղից բռնի տեղահանվածները հուլիսի 9-ին բողոքի ցույց են կազմակերպել Հայաստանում ՄԱԿ-ի գրասենյակի դիմաց՝ պահանջելով իրականացնել Կազմակերպության Արդարադատության միջազգային դատարանի 2021 և 2023 թվականների որոշումները։ Բողոքի ակցիայի մասնակիցներից Արմինա Ավակիմյանը հիշեցրեց, որ Ադրբեջանը նպատակաուղղված կերպով ոչնչացնում է հայկական հետքերը Լեռնային Ղարաբաղում։ Նա պահանջել է, որ ՄԱԿ-ը ճնշում գործադրի Ադրբեջանի վրա՝ անձեռնմխելի պահելու ղարաբաղցի հայերի մասնավոր սեփականությունն ու հոգևոր ու մշակութային ժառանգությունը մինչև նրանց վերադարձը Լեռնային Ղարաբաղ։ Ավակիմյանը կարծում է, որ Հայաստանի իշխանությունները պասիվ են ղարաբաղցի հայերի վերադարձն ապահովելու հարցում։ Նրա գնահատմամբ՝ փորձ է արվում օրակարգից հանել Լեռնային Ղարաբաղի և նրա բնակիչների վերադարձի հարցը։ «Եթե ֆիզիկական անվտանգության նկատառումներից ելնելով լքել ենք հայրենիքը, դա չի նշանակում, որ հարմարվում ենք իրավիճակին, նույնիսկ Ադրբեջանում զարմանում են, թե ինչպես են Լեռնային Ղարաբաղի բնակիչների իրավունքների հարցը հանում օրակարգից. - եզրափակեց ցուցարարը։