News - Սլովակիայում գնացքի և ավտոբուսի բախման հետևանքով առնվազն 7 մարդ է զոհվել

Սլովակիայի հարավում գտնվող Նովե Զամկի քաղաքի մերձակայքում մարդատար գնացքի բախման հետևանքով առնվազն յոթ մարդ է զոհվել, ևս հինգը վիրավորվել են, հայտնում են տեղական արտակարգ իրավիճակների ծառայությունները։ «Ես մտավախություն ունեմ, որ այս վթարի հետևանքով զոհերի թիվը կարող է աճել», - AFP-ին ասել է փրկարար ծառայության ներկայացուցիչ Պետրա Կլիմեսովան: Վթարը տեղի է ունեցել հինգշաբթի ժամը 17-ի սահմաններում։ Միջազգային էքսպրես EuroCity 279-ը Պրահայից մեկնում էր Բուդապեշտ: Նշված ավտոբուսում եղել է ինը մարդ, այդ թվում՝ վարորդը։ Ավտոբուսը պոկվել է երկու մասի, մի մասը ետ է շպրտվել, իսկ մյուս մասը գնացքը քարշ է տվել մի քանի տասնյակ մետր, գրում է Mynovezamky-ն։ Վթարի հետևանքով գնացքի լոկոմոտիվը հրդեհվել է, իսկ վարորդը վիրավորվել է։ Տարբեր աղբյուրների համաձայն՝ գնացքում եղել է 100-ից 200 մարդ։ Նրանցից ոչ ոք լուրջ վնասվածքներ չի ստացել։ Դեպքի վայր են ժամանել շտապօգնության հինգ մեքենա և երեք փրկարարական ուղղաթիռ։ Բախումը տեղի է ունեցել արգելապատնեշներով և լուսային ազդանշաններով հսկվող երկաթուղային անցումում։ Ենթադրվում է, որ դրանք վնասվել են օրերս փոթորկից հետո և պետք է վերանորոգվեին նույն օրը, հայտնում է Noviny-ն։ Սլովակիայի երկաթուղու ներկայացուցիչները չեն մեկնաբանել այս հաղորդագրությունները։