News - ԱԳՆ. Հայաստանը ճանաչում է Պաղեստին պետությունը

Գազայում աղետալի հումանիտար իրավիճակը և շարունակվող ռազմական հակամարտությունը միջազգային քաղաքական օրակարգի առաջնային խնդիրներից են, որոնք կարգավորում են պահանջում։ Այս մասին ասվում է Հայաստանի արտաքին գործերի նախարարության ուրբաթ տարածած հաղորդագրության մեջ։ «Հայաստանի Հանրապետությունը կտրականապես մերժում է քաղաքացիական ենթակառուցվածքների թիրախավորումը, քաղաքացիական բնակչության նկատմամբ բռնությունը և զինված բախումների ժամանակ քաղաքացիական անձանց պատանդ վերցնելը` միանալով նրանց անվերապահ ազատ արձակելու միջազգային հանրության պահանջներին։ Հայաստանի Հանրապետությունը միացել է ՄԱԿ-ի Գլխավոր ասամբլեայի բանաձեւերին, որոնք կոչ են անում անհապաղ զինադադար հաստատել Գազայում։ Ավելին, Հայաստանի Հանրապետությունն անկեղծորեն հավատարիմ է Մերձավոր Արևելքում խաղաղության և կայունության հաստատմանը և հրեա և պաղեստինյան ժողովուրդների միջև կայուն հաշտեցմանը: Միջազգային տարբեր հարթակներում մեր դիրքորոշումը մշտապես եղել է պաղեստինյան հիմնախնդրի խաղաղ ու համապարփակ կարգավորման օգտին, և մենք աջակցում ենք իսրայելա-պաղեստինյան հակամարտության «երկու պետությունների» լուծմանը։ Մենք համոզված ենք, որ դա միակ ճանապարհն է ապահովելու, որ և՛ պաղեստինցիները, և՛ իսրայելցիները կարողանան իրականացնել իրենց օրինական ձգտումները։ Ելնելով վերոգրյալից և վերահաստատելով մեր հավատարմությունը միջազգային իրավունքին և ժողովուրդների իրավահավասարության, ինքնիշխանության և խաղաղ գոյակցության սկզբունքներին, Հայաստանի Հանրապետությունը ճանաչում է Պաղեստին պետությունը»,- ասված է ՀՀ ԱԳՆ-ի հայտարարության մեջ։