News - Ջեյմս Օ՛Բրայենը՝ Նիկոլ Փաշինյանին. ԱՄՆ-ը կշարունակի օգնությունը Հայաստանի կառավարությանը
Business Strategy
Ջեյմս Օ՛Բրայենը՝ Նիկոլ Փաշինյանին. ԱՄՆ-ը կշարունակի օգնությունը Հայաստանի կառավարությանը
Վարչապետի աշխատակազմից NEWS.am-ին հայտնում են, որ վարչապետ Նիկոլ Փաշինյանն ընդունել է ԱՄՆ Պետդեպարտամենտի Եվրոպայի և Եվրասիայի հարցերով քարտուղարի օգնական Ջեյմս Օ՛Բրայենին։ Վարչապետը կարևորել է երեքշաբթի Երևանում Հայաստան-ԱՄՆ ռազմավարական երկխոսության գագաթնակետային հանդիպման անցկացումը և համոզմունք հայտնել, որ այն նոր լիցք կհաղորդի Հայաստանի և ԱՄՆ-ի միջև բազմաոլորտ համագործակցության հետագա զարգացմանն ու ամրապնդմանը։ Փաշինյանն ընդգծել է նաև ԱՄՆ-ի հետևողական աջակցությունը Հայաստանում իրականացվող ժողովրդավարական բարեփոխումներին։ Վարչապետը նշել է, որ կարևոր է մայիսի 5-ին Բրյուսելում կայացած Հայաստան-ԵՄ-ԱՄՆ բարձր մակարդակի հանդիպման ընթացքում ձեռք բերված պայմանավորվածությունների արդյունավետ իրականացումը։ Ջեյմս Օ՛Բրայենն իր հերթին գոհունակությամբ ընդգծել է, որ Երևանում կայացած Հայաստան-ԱՄՆ ռազմավարական երկխոսության գագաթնակետային հանդիպումն արդյունավետ է անցել՝ հավելելով, որ ԱՄՆ վարչակազմը շարունակելու է աջակցել Հայաստանի կառավարությանը՝ տարբեր ոլորտներում բարեփոխումները խթանելու համար։ Զրուցակիցներն անդրադարձել են Հայաստան-Ադրբեջան խաղաղության պայմանագրի, 1991թ. Ալմա-Աթայի հռչակագրի հիման վրա սահմանազատման գործընթացին, ինչպես նաև Հայաստանի կառավարության «Խաղաղության խաչմերուկ» նախագծին և դրա սկզբունքներին վերաբերող քննարկումներին։ Բացի այդ, վարչապետ Փաշինյանը տեղեկացրել է, որ ՀՀ կառավարությունը հաստատել է Լեռնային Ղարաբաղից բռնի տեղահանված հայերի բնակարանային ապահովման ծրագիրը և դրա իրականացման գործում ընդգծել միջազգային գործընկերների աջակցության անհրաժեշտությունը։
About usyoo
Categories
Tags
