News - Փաշինյանը կարևորում է Հայաստան-ԵՄ համագործակցության զարգացումը, ընդլայնումը

Վարչապետ Նիկոլ Փաշինյանն ընդունել է Եվրոպական արտաքին գործողությունների ծառայության Ռուսաստանի, Արևելյան գործընկերության, Կենտրոնական Ասիայի, տարածաշրջանային համագործակցության և ԵԱՀԿ կառավարիչ տնօրեն Մայքլ Զիբերթին։ Վարչապետն ընդգծել է Հայաստան-Եվրոպական Միություն (ԵՄ) համագործակցության հետևողական զարգացումն ու ընդլայնումը, երկկողմ օրակարգով նախատեսված միջոցառումների արդյունավետ իրականացումը։ Փաշինյանն ընդգծել է կապերի զարգացման անհրաժեշտությունը ոչ միայն քաղաքական, այլ նաև տնտեսական, տեխնոլոգիական, զբոսաշրջության ոլորտներում։ Վարչապետը նաև կարևորել է ապրիլի 5-ին Բրյուսելում կայացած Հայաստան-ԵՄ-ԱՄՆ բարձր մակարդակի հանդիպումը և այդ հանդիպման ընթացքում ձեռք բերված պայմանավորվածությունների իրականացումը։ Մայքլ Զիբերտն իր հերթին ընդգծել է Հայաստանի հետ համագործակցությունը զարգացնելու ԵՄ հանձնառությունն ու պատրաստակամությունը։ Նրա խոսքով, ԵՄ-ն կշարունակի ակտիվորեն նպաստել Հայաստանի հետ հարաբերությունների ընդլայնման օրակարգի լիարժեք իրականացմանը։ ԵՄ անունից Զիբերտը ցավակցություն է հայտնել Հայաստանի Լոռու և Տավուշի մարզերում վերջերս տեղի ունեցած ջրհեղեղի զոհերի համար և պատրաստակամություն հայտնել անհրաժեշտ օգնություն ցուցաբերել վերականգնողական աշխատանքներում։ Զրուցակիցները քննարկել են նաև Հայաստան-ԵՄ գործընկերությունը, ԵՄ Արևելյան գործընկերության ծրագիրը և տարածաշրջանային անվտանգությունը, այդ թվում՝ Հայաստան-Ադրբեջան խաղաղության գործընթացը։