News - Հատուկ ոստիկանները բերման են ենթարկել Հայաստանի ընդդիմադիր պատգամավորին՝ քաշքշելով, հարվածելով

Քիչ առաջ ոստիկանության հատուկ ջոկատայինները Երևանի կենտրոնում՝ Հանրապետության հրապարակից, քաշքշելով և հարվածելով բերման են ենթարկել ընդդիմադիր պատգամավոր Աշոտ Սիմոնյանին, ով իր մեքենայով փողոց էր փակել։ Այնտեղ էր նաև ընդդիմադիր պատգամավոր Քրիստինե Վարդանյանը։ Բացի այդ, համացանցում տեսանյութ է հրապարակվել, որտեղ երեւում է, թե ինչպես են ոստիկանները հարվածում Սիմոնյանին՝ փորձելով նրան բերման ենթարկել։ Ոստիկանությունից հայտնեցին, որ Սիմոնյանին բերման ենթարկելու փորձի փաստով նշանակվել է ծառայողական քննություն։ Երկուշաբթի վաղ առավոտից Հայաստանում բողոքի ակցիաներ են սկսվել։ Մասնավորապես, ցուցարարների կողմից փակ են Երևան-Աշտարակ և Երևան-Արմավիր ավտոճանապարհները։ «Տավուշ հանուն հայրենիքի» շարժման առաջնորդ, Հայ առաքելական եկեղեցու Տավուշի թեմի առաջնորդ Բագրատ արքեպիսկոպոս Գալստանյանը, ինչպես ինքն էր ասել կիրակի, ինքն էլ իր սև ամենագնացով փակել է Երևանի կենտրոնում ճանապարհը։ Մյուս ցուցարարները փակել են մի քանի այլ փողոցներ։ Երկուշաբթի առավոտյան ժամը 9:30-ի դրությամբ ընդհանուր առմամբ բերման է ենթարկվել 137 մարդ. Նրանց թվում է ընդդիմադիր պատգամավոր Արթուր Սարգսյանը։