News - Հանրապետության հրապարակում մեկնարկել է Բագրատ արքեպիսկոպոսի գլխավորած հանրահավաքը (ուղիղ)

Երևանի Հանրապետության հրապարակում մեկնարկում է «Տավուշը հանուն հայրենիքի» շարժման համաժողովրդական հանրահավաքը՝ Տավուշի թեմի առաջնորդ Բագրատ արքեպիսկոպոսի գլխավորությամբ։ Մինչ հանրահավաքը մի խումբ երիտասարդներ իրազեկման երթ իրականացրին Երեւանի փողոցներով՝ երթով շարժվելով դեպի Հանրապետության հրապարակ։ Բագրատ արքեպիսկոպոսն այսօր ուղերձ է հղել՝ իր զորակցությունը հայտնելով ավերիչ ջրհեղեղից տուժած Լոռու և Տավուշի բնակիչներին, ապա նշել, որ նախատեսված հանրահավաքը տեղի կունենա։ «Որպես այդպիսին՝ մենք օրակարգից շեղվելու առիթ կամ պատճառ չունենք»,- ասաց նա։ Շաբաթ օրը «Տավուշը հանուն հայրենիքի» շարժումը հայտարարություն է տարածել՝ նշելով, որ հանրահավաքից առաջ իրենց համակիրների նկատմամբ ապօրինի հալածանքների են ենթարկվել։ «Շարժման կողմնակիցներին պատկանող ձեռնարկություններում սկսվել են արտահերթ ստուգումներ և քննչական գործողություններ. Տարբեր ուժային կառույցների ներկայացուցիչներ սկսել են այցելել մեր համախոհների ու նրանց հարազատների տներ՝ անհարկի անհանգստություն պատճառելով մեր քաղաքացիներին։ Բռնաճնշումների նոր ալիք է սկսվել նաեւ արցախահայության դեմ. Մենք պարբերաբար լուրեր ենք ստանում Արցախի քաղաքապետերի ձերբակալությունների մասին»,- ասված է շարժման հայտարարության մեջ։