News - Բլինկեն. ԱՄՆ-ն ցանկանում է ավելացնել Հայաստանին տրամադրվող օգնությունը

Միացյալ Նահանգները վերանայում է Հայաստանի մի շարք խնդրանքներ՝ որոշելու, թե ավելին ինչ կարող է անել Հայաստանին իր օգնությունն ու համագործակցությունը մեծացնելու համար: ԱՄՆ Կոնգրեսի Ներկայացուցիչների պալատի արտաքին հարաբերությունների հանձնաժողովի լսումների ժամանակ նման հայտարարություն է արել ԱՄՆ պետքարտուղար Էնթոնի Բլինկենը՝ չմանրամասնելով։ Բլինկենը նաև հիշեցրել է, որ ապրիլի սկզբին Բրյուսելում համատեղ հանդիպում է ունեցել Եվրոպական հանձնաժողովի նախագահ Ուրսուլա ֆոն դեր Լեյենի և Հայաստանի վարչապետ Նիկոլ Փաշինյանի հետ։ ԱՄՆ պետքարտուղարի խոսքով, այս խորհրդակցություններն անցկացվել են, որպեսզի պարզվի, թե էլ ինչ կարող են անել ԱՄՆ-ն և ԵՄ-ն Հայաստանին աջակցելու համար։ Եվ նրանք առաջ կգնան մի շարք տարբեր ոլորտներում, խոստացել է Բլինկենը: Ավելին, ԱՄՆ պետքարտուղարը հույս է հայտնել, որ Հայաստանն ու Ադրբեջանը կստորագրեն խաղաղության պայմանագիր։