News - Միրզոյանը և Լուի Բոնոն մտքեր են փոխանակել տարածաշրջանային հաղորդակցությունների ապաշրջափակման վերաբերյալ

Հայաստանի Հանրապետության արտաքին գործերի նախարար Արարատ Միրզոյանը մարտի 13-ին ընդունել է Կովկասի բանակցությունների հարցերով ԱՄՆ ավագ խորհրդական Լուի Բոնոյին, հայտնում է ԱԳՆ-ն։ Զրուցակիցները քննարկել են Հարավային Կովկասում անվտանգության իրավիճակին վերաբերող հարցեր։ Անդրադարձ է եղել Հայաստանի և Ադրբեջանի միջև հարաբերությունների կարգավորման գործընթացին, այդ թվում՝ խաղաղության պայմանագրի քննարկումներին։ Նախարար Միրզոյանն իր զրուցակցին ներկայացրել է վերջին զարգացումները՝ ընդգծելով առանցքային հարցերի շուրջ Հայաստանի դիրքորոշումները։ Մասնավորապես, ընդգծվել է տարածքային ամբողջականության փոխադարձ ճանաչման և սահմանազատման հետագա գործընթացի կարևորությունը՝ հիմնված 1991 թվականի Ալմա-Աթայի հռչակագրի և քարտեզների վրա, որոնք ունեն ամուր իրավական հիմքեր։ Տարածաշրջանային հաղորդակցությունների ապաշրջափակման համատեքստում նախարար Միրզոյանը վերահաստատել է Հայաստանի հետևողական մոտեցումը գործընթացն իրականացնելու՝ հիմնված հանրահայտ սկզբունքների վրա՝ ինքնիշխանություն, իրավասություն, փոխադարձություն և իրավահավասարություն։ Արարատ Միրզոյանը և Լուի Բոնոն մտքեր են փոխանակել նաև Հայաստան-ԱՄՆ քաղաքական երկխոսության օրակարգի, առաջիկա իրադարձությունների, երկկողմ գործընկերության հետագա զարգացման հարցերի շուրջ։