News - Ֆրանսիան Հայաստանին և Ադրբեջանին կոչ է անում շարունակել սահմանների սահմանազատումը համաձայնեցված սկզբունքների հիման վրա

Ֆրանսիան կոչ է անում Հայաստանին և Ադրբեջանին շարունակել սահմանազատել իրենց սահմանները՝ հավատարիմ մնալով 2024 թվականի ապրիլի 19-ին հաստատված սկզբունքներին և շարունակել նախնական սահմանազատման աշխատանքները, որոնք իրականացվել են տեղում, հայտարարել է Ֆրանսիայի արտաքին գործերի նախարարությունը։ Հայտարարության մեջ Ֆրանսիան ողջունում է Հայաստանի և Ադրբեջանի ԱԳ նախարարների միջև բանակցությունների նոր փուլի անցկացումը։ Ֆրանսիան ընդգծում է 1991 թվականի Ալմաթիի հռչակագրին և միմյանց տարածքային ամբողջականության փոխադարձ ճանաչմանը կողմերի հավատարմությունը վերահաստատելու կարևորությունը՝ որպես այս գործընթացի հիմք և որպես 2022 թվականի հոկտեմբերի 7-ին Պրահայում կայացած քառակողմ հանդիպման շարունակություն։ Ֆրանսիան նաև կոչ է անում շարունակել քննարկումները՝ ուղղված երկու ժողովուրդների միջև խաղաղության պայմանագրի ստորագրմանը և ողջունում է Ղազախստանի իշխանությունների նախաձեռնությունը՝ հեշտացնելու այդ բանակցությունները։ Հայտարարության մեջ նշվում է, որ Ֆրանսիան կշարունակի աշխատել իր գործընկերների հետ՝ ի շահ Հարավային Կովկասում արդար և կայուն խաղաղության հաստատման՝ միջազգային իրավունքին համապատասխան։ Հայաստանի ԱԳ նախարար Արարատ Միրզոյանի և Ադրբեջանի ԱԳ նախարար Ջեյհուն Բայրամովի բանակցությունները տեղի են ունեցել մայիսի 10-ին և 11-ին Ղազախստանի Ալմաթի քաղաքում։ Նախարարները ողջունել են սահմանների սահմանազատման առաջընթացը և այդ ուղղությամբ ձեռք բերված պայմանավորվածությունները։ Նախարարները և նրանց պատվիրակությունները շարունակել են «Հայաստանի և Ադրբեջանի միջև խաղաղության և միջպետական ​​հարաբերությունների հաստատման մասին» երկկողմ համաձայնագրի նախագծի քննարկումները։ Կողմերը պայմանավորվել են շարունակել բանակցությունները չլուծված հարցերի շուրջ, որտեղ դեռ կան տարաձայնություններ։ Այցի ընթացքում նախարարներն առանձին և երկկողմանի հանդիպել են Ղազախստանի փոխվարչապետ, արտաքին գործերի նախարար Մուրատ Նուրթլեուի հետ։ Նախարար Միրզոյանն իր երախտագիտությունը հայտնեց ղազախական կողմին՝ Հայաստանի և Ադրբեջանի միջև բանակցությունները հյուրընկալելու համար։