News - Հայաստանը փախստականի կարգավիճակ է շնորհել Բելառուսի քաղաքացուն

Հայաստանը փախստականի կարգավիճակ է շնորհել Բելառուսի քաղաքացի Յարոսլավ Նովիկովին, ով կալանավորվել էր Բելառուսի գլխավոր դատախազության պահանջով, հայտնել է նրա փաստաբան Արայիկ Պապիկյանը, հաղորդում է «Ազատություն» ռադիոկայանի բելառուսական ծառայությունը։ «Յարոսլավը նոր է ստացել փախստականի կարգավիճակ, քիչ ուշ նրան ազատ կարձակեն»,- տեղեկացրեց Պապիկյանը։ Բելառուսի քաղաքացի Յարոսլավ Նովիկովը ձերբակալվել է փետրվարի 2-ին հայ-վրացական սահմանը հատելիս, 2023 թվականի ամռանը նրա դեմ քրեական գործ է հարուցվել Բելառուսում՝ զինվորական ծառայությունից խուսափելու համար։ Իսկ անցած սեպտեմբերին այս մարդու նկատմամբ միջազգային հետախուզում էր հայտարարվել։ Բելառուսը ծրագրել էր Վրաստանից անցնել Բուլղարիա, սակայն վիզա չի ստացել։ Նրան խորհուրդ են տվել անհրաժեշտ վիզա ստանալ հայրենիքում, սակայն Նովիկովն այնտեղ չի մեկնել ձերբակալության վտանգի պատճառով։ Փոխարենը նա գնացել է հարեւան Հայաստան՝ վիզա ստանալու, որտեղ էլ բերման է ենթարկվել։ Փետրվարի 7-ին հայտարարվեց, որ Յարոսլավ Նովիկովը քաղաքական ապաստան և փախստականի կարգավիճակ է խնդրել Հայաստանից, քանի որ վախենում է քրեական հետապնդումից Բելառուսին արտահանձնելու դեպքում։ 2022-2023 թվականներին Հայաստանի իշխանությունները ձերբակալել են Բելառուսի մի քանի քաղաքացիների։ Այս բոլոր ձերբակալությունները տեղի են ունեցել հայ-վրացական սահմանին, երբ բելառուսները փորձել են «զրոյացնել» Վրաստանում գտնվելու ժամկետը՝ ժամանակավորապես գալով Հայաստան։