News - «ՄեդիաՀաբ». Փաշինյանը չի մասնակցի Պուտինի երդմնակալությանը

Մայիսի 7-ին Մոսկվայում տեղի կունենա Ռուսաստանի վերընտրված նախագահ Վլադիմիր Պուտինի երդմնակալության արարողությունը։ Երկրում կայացած նախագահական ընտրություններից հետո օրակարգային հարցերից մեկն այն էր, թե արդյոք ՀՀ վարչապետ Նիկոլ Փաշինյանը կմեկնի Ռուսաստան՝ մասնակցելու այդ արարողությանը։ Իսկ MediaHub-ի աղբյուրը հայտնում է, որ որոշվել է, որ Փաշինյանը ներկա չի լինելու։ Հիմնականում Հայաստանը ցանկանում է եւս մեկ անգամ ցույց տալ, որ դժգոհ է Ռուսաստանից՝ որպես դաշնակից։ Ըստ վերոնշյալ աղբյուրի՝ Փաշինյանը Ռուսաստանում կլինի միայն մայիսի 8-ին՝ մասնակցելու Եվրասիական տնտեսական միության 10-ամյակի կապակցությամբ կայանալիք գագաթնաժողովին։ Փաշինյանը, սակայն, չի մասնակցի մայիսի 9-ին Հաղթանակի օրը կայանալիք միջոցառումներին. սա Արեւմուտքի պահանջն է, հավելել է MediaHub-ը։ Այս տեղեկատվության հավաստիությունը NEWS.am-ը փորձեց ճշտել ՀՀ կառավարությունից, որտեղից ասացին. «Վարչապետի բոլոր այցերի վերաբերյալ ժամանակին պատշաճ տեղեկատվություն ենք տրամադրում»։