News - Հայաստանը գլխավոր հյուպատոսություն կբացի Իրանի Թավրիզում

Հինգշաբթի կառավարության նիստում Հայաստանի կառավարությունը լրացում կատարեց Իրանում Հայաստանի հյուպատոսություն հիմնելու որոշման մեջ։ Այս որոշման նախագծով առաջարկվում է Իրանի Թավրիզ քաղաքում բացել Հայաստանի գլխավոր հյուպատոսություն։ Այս որոշման պարզաբանման մեջ նշվում է, որ 2022 թվականին Հայաստանի վարչապետը և Իրանի նախագահը պայմանավորվածություն են ձեռք բերել երկու երկրների միջև ապրանքաշրջանառության ծավալը հասցնել մեկ, ապա՝ երեք միլիարդ ԱՄՆ դոլարի։ Իսկ Թավրիզում Հայաստանի գլխավոր հյուպատոսության գործունեությունը կարող է նպաստել Հայաստան-Իրան տնտեսական հարաբերությունների զարգացմանը։ 2022 թվականի հոկտեմբերից Հայաստանի Կապան քաղաքում գործում է Իրանի գլխավոր հյուպատոսությունը, հետևաբար Իրանի Արևելյան Ադրբեջան նահանգի Թավրիզում Հայաստանի գլխավոր հյուպատոսության ստեղծումը կապահովի փոխադարձության սկզբունքի իրականացումը։ Իրանի Արևելյան Ադրբեջան նահանգը սահմանակից է Հայաստանի Սյունիքի մարզին, և Թավրիզում Հայաստանի գլխավոր հյուպատոսության հիմնումը մեծապես կնպաստի երկու վարչական տարածքային միավորների միջև առևտրային, սոցիալ-մշակութային, միջանձնային և զբոսաշրջային հաղորդակցության հետագա զարգացմանը: Հայաստանի արտաքին գործերի նախարարությունը նպատակահարմար է համարում Թավրիզում Հայաստանի գլխավոր հյուպատոսության ստեղծումը, որը համահունչ է Հայաստանի արտաքին քաղաքականությանն ու շահերին։