News - Ղարաբաղի նախագահն անդրադառնում է Արցախից Հայաստան խաղաղ բնակչության տեղափոխմանը

Արցախի նախագահի աշխատակազմի տեղեկատվության գլխավոր վարչությունից NEWS.am -ին հայտնում են, որ ուրբաթ օրը Արցախի նախագահ Սամվել Շահրամանյանի մոտ տեղի է ունեցել աշխատանքային խորհրդակցություն։ Քննարկման օրակարգում են եղել Արցախում Ադրբեջանի կողմից լիակատար շրջափակման հետևանքով ստեղծված իրավիճակը և դրա հաղթահարման մեխանիզմները։ Քննարկվել են նաև բնակչության պարենային խնդիրների լուծման, գյուղմթերքների գնագոյացման, կենսական նշանակության ապրանքների բաշխման և այլ հրատապ հարցեր։ Նախագահ Շահրամանյանը նշել է, որ կառավարությունը պետք է օպերատիվ միջոցներ ձեռնարկի Արցախում պարենային ռեսուրսները կենտրոնացնելու, բնակչությանը կենսական նշանակություն ունեցող ապրանքների կտրոնային համակարգի միջոցով կազմակերպելու գործընթացը։ «Մենք պետք է անհապաղ արձագանքենք բնակչության շրջանում առկա դժգոհություններին, օգտագործենք բոլոր անհրաժեշտ միջոցները գյուղմթերքի գնաճը կանխելու, գները կարգավորելու և առկա սուղ ռեսուրսները արդարացիորեն բաշխելու համար»,- ընդգծել է երկրի ղեկավարը։ Խորհրդակցության ընթացքում նախագահն անդրադարձել է նաև ռուս խաղաղապահների և Կարմիր խաչի միջազգային կոմիտեի ուղեկցությամբ Արցախից Հայաստան խաղաղ բնակչության տեղափոխման խնդիրներին։ Սամվել Շահրամանյանը նշեց, որ այս գործընթացը պետք է իրականացվի խիստ վերահսկողական պայմաններում, թափանցիկ և գործող կանոնակարգերին համապատասխան։ Այդ համատեքստում երկրի ղեկավարն ընդգծել է աշխատանքային խմբերի ստեղծման անհրաժեշտությունը։ Նախագահը կոնկրետ հանձնարարականներ է տվել լիազոր մարմինների ղեկավարներին խորհրդակցության օրակարգային հարցերի վերաբերյալ։