News - Հայաստանի ԱԳՆ. 21-րդ դարում մենք բախվեցինք էթնիկ զտումների քաղաքականության նոր դրսեւորումների, հետեւանքների հետ

Ապրիլի 24-ին մենք ոգեկոչում և խոնարհվում ենք 20-րդ դարասկզբին Օսմանյան կայսրությունում իրականացված Հայոց ցեղասպանության նահատակների հիշատակի առջև։ Այս մասին Հայաստանի արտաքին գործերի նախարարությունը (ԱԳՆ) նշել է չորեքշաբթի օրը Հայոց ցեղասպանության 109-րդ տարելիցի կապակցությամբ տարածած հայտարարության մեջ։ Հայտարարությունը շարունակվում է հետևյալ կերպ. «1915 թվականից սկսած երիտթուրքերի կառավարության կողմից մարդկության դեմ իրականացված հանցագործությունների արդյունքում շուրջ 1,5 միլիոն հայ, այդ թվում՝ երեխաներ, կանայք և ծերեր, սպանվել են բացառապես իրենց ազգության հիման վրա՝ հայ լինելու համար։ Միլիոնավոր հայեր զրկվել են իրենց ունեցվածքից, ինչպես նաև պատմական, մշակութային և հոգևոր ժառանգությունից։ Հայերի դեմ կատարված այս հանցագործությունը հետագայում հիմք դարձավ «Ցեղասպանության հանցագործությունը կանխելու եւ պատժելու մասին» միջազգային կոնվենցիայի սահմանման համար։ Ցավոք սրտի, չնայած դրան հաջորդած ջանքերին, ցեղասպանության վտանգը դեռևս առկա է աշխարհում։ Արդեն 21-րդ դարում՝ 2020-2023 թվականներին, բախվեցինք էթնիկ զտումների քաղաքականության նոր դրսեւորումների ու հետեւանքների հետ։ Պատերազմի, այլատյացության, ինքնության վրա հիմնված հանցագործությունների, պաշարման և բնակչության դեմ հետևողական ահաբեկման գործողությունների պատճառով ավելի քան 150,000 հայեր բռնի տեղահանվել և ստիպված լքել են իրենց պատմական հայրենիքը։ Հաշվի առնելով ցեղասպանության ռիսկերն ու դեպքերը, որոնց ականատես եղավ ժամանակակից աշխարհը, ինչպես նաև մարդու իրավունքների և միջազգային մարդասիրական իրավունքի կոպիտ խախտումների բազմաթիվ այլ օրինակներ՝ Հայաստանը շարունակում է իր ակտիվ ներգրավվածությունը միջազգային հարթակներում՝ ցեղասպանության հանցագործության դեմ պայքարում ջանքերը համակարգելու նպատակով։ , կանխելու նոր ցեղասպանություններն ու մարդկության դեմ հանցագործությունները, պաշտպանելու զոհերի իրավունքները»։