News - Ուրուգվայի Ներկայացուցիչների պալատի խոսնակ. Հայ ժողովուրդը կրկին պայքարում է ատելության դեմ

Երեքշաբթի Ուրուգվայի Ներկայացուցիչների պալատում տեղի է ունեցել միջոցառում՝ նվիրված Հայոց ցեղասպանության 109-րդ տարելիցին, հայտնում են Ուրուգվայում Հայաստանի դեսպանությունից։ Բացման խոսքով հանդես եկավ Ներկայացուցիչների պալատի նախագահ Անա Օլիվերան: Դատապարտելով Հայոց ցեղասպանության մեղավորներին և հանգամանալից ներկայացնելով մի շարք պատմական փաստեր, այդ թվում՝ Ուրուգվայի կողմից Հայոց ցեղասպանության պաշտոնական ճանաչման գործընթացի մանրամասները, Օլիվերան անդրադարձել է նաև Ադրբեջանի կողմից Լեռնային Ղարաբաղի հայ բնակչության բռնի տեղահանմանը, հավելելով. որ Ադրբեջանի հետ Հայաստանի սահմանին լարվածությունն ու անորոշությունը շարունակվում է Ադրբեջանի ագրեսիվ գործողությունների պատճառով։ «Հայ ժողովուրդը կրկին պայքարում է ատելության դեմ: Բայց նա միայնակ չէ այդ պայքարում, որովհետև միջազգային հանրությունը կկանգնի նրանց կողքին: Հայերն աշխարհում ոչ մի տեղ չեն կորցրել իրենց ինքնությունը»,- ասաց Անա Օլիվերան: Այս միջոցառման շրջանակում տեսաուղերձով հանդես են եկել նաև Միջազգային քրեական դատարանի նախկին գլխավոր դատախազ Լուիս Մորենո Օկամպոն և Փարիզի քաղաքապետ Անն Իդալգոն։