News - Հայաստանի փոխվարչապետը և ԵՄ ներկայացուցիչը պայմանավորվել են ավելի արդյունավետ դարձնել CEPA-ի կիրարկման գործընթացը

Կառավարությունից NEWS.am-ին հայտնում են, որ փոխվարչապետ Մհեր Գրիգորյանն ընդունել է Հայաստանում Եվրոպական միության (ԵՄ) պատվիրակության նորանշանակ ղեկավար, դեսպան Վասիլիս Մարագոսին։ Հանդիպման ընթացքում երկուստեք բարձր են գնահատվել Հայաստան-Եվրամիություն հարաբերությունների մակարդակը։ Այս համատեքստում կարեւորվել է Հայաստանում ԵՄ քաղաքացիական առաքելության աշխատանքը։ Զրուցակիցներն ընդգծել են ԵՄ-ի և Հայաստանի միջև Համապարփակ և ընդլայնված գործընկերության համաձայնագրի (ՀԸԳՀ) իրագործման կարևորությունը ոլորտային բարեփոխումների իրականացման տեսանկյունից։ Պայմանավորվածություն ձեռք բերվեց համատեղ ջանքեր գործադրել CEPA-ի կիրարկման գործընթացն առավել արդյունավետ դարձնելու համար։ Քննարկվել է նաև ԵՄ տնտեսական և ներդրումային ծրագրով Հայաստանում իրականացվող ծրագրերի ընթացքը։ Այս համատեքստում ընդգծվել է ԵՄ ֆինանսական կազմակերպությունների հետ Հայաստանի համագործակցության կարևորությունը։